بیجنگ (مانیٹرنگ ڈیسک) چینی صدر شی جن پنگ اور روسی صدر ولادیمیر پیوٹن کے درمیان ہونے والے دلچسپ مکالمہ ریکارڈ ہونے کے بعد دنیا بھر میں نئی بحث و تکرار شروع ہو گئی ہے۔
انٹرنیشنل میڈیا کے مطابق غیر ارادی طور پر ریکارڈ ہونے والی گفتگو میں دونوں رہنما انسانی اعضا کی پیوندکاری اور انسانوں کی عمر150 سال تک بڑھنے کے امکانات پر بات کر رہے تھے۔ یہ واقعہ اس وقت پیش آیا جب پیوٹن اور شی جن پنگ شمالی کوریا کے رہنما کم جونگ ان کے ساتھ غیر ملکی رہنماں کے ایک وفد کی قیادت کرتے ہوئے فوجی پریڈ کے معائنے کے لیے جارہے تھے۔ یہ گفتگو سرکاری نشریاتی ادارے سی سی ٹی وی کی لائیو اسٹریمنگ میں نشر ہوئی، جسے دیگر میڈیا اداروں سمیت سی جی ٹی این، ایسوسی ایٹڈ پریس اور رائٹرز نے بھی حاصل کیا۔
چین کے ریڈیو اور ٹی وی ایڈمنسٹریشن کے مطابق اس کوریج کو آن لائن 1.9 ارب بار دیکھا گیا جبکہ 40 کروڑ سے زائد ناظرین نے ٹی وی پر براہِ راست دیکھا۔ پیوٹن اور شی جب اسٹیج کی طرف بڑھ رہے تھے تو پیوٹن کے مترجم کو چینی زبان میں کہتے سنا گیا کہ بائیوٹیکنالوجی مسلسل ترقی کر رہی ہے۔ اس کے بعد مترجم نے مزید کہا انسانی اعضا کو بار بار ٹرانسپلانٹ کیا جا سکتا ہے، جتنا زیادہ آپ زندہ رہیں گے، اتنے ہی جوان دکھائی دیں گے، حتی کہ آپ امر بھی ہو سکتے ہیں۔
