پاک فوج کا فتح 4 گرائونڈ لانچڈ کروز میزائل کا کامیاب تجربہ، دشمن کی نیندیں حرام
اسلام آباد(کھوج نیوز) پاک فوج نے فتح 4گرائونڈ لانچڈ کروز میزائل کا کامیاب تجربہ کر کے دشمن کی نیندیں حرام کر دی ہیں، یہ میزائل ملکی سطح پر تیار کیا گیا ہے اور اس کی رینج 750کلو میٹر ہے۔
تفصیلات کے مطابق آئی ایس پی کا کہنا تھا کہ فتح 4گرائونڈ لانچڈ کروز میزائل جدید ایویانکس اور نیویگیشنل آلات سے لیس ہے، میزائل دشمن کے میزائل ڈیفنس سسٹم کو چکمہ دینے کی صلاحیت رکھتا ہے اور زمینی سطح کے ساتھ پرواز کی خصوصیات کا حامل ہے۔ ان خصوصیات کے باعث یہ میزائل اہداف کو انتہائی درستگی کے ساتھ نشانہ بنانے کی صلاحیت رکھتا ہے۔
آئی ایس پی آر کے مطابق چیف آف جنرل اسٹاف، پاک افواج کیسینئر افسران اور سائنسدانوں و انجینئرز نے تجربے کا مشاہدہ کیا۔ فتح 4 میزائل آرمی راکٹ فورس کمانڈ کا حصہ ہے جو پاکستان آرمی کے میزائل نظام کی رینج اور صلاحیت کو مزید بہتر بنائے گا۔ صدرِ مملکت، وزیرِاعظم ، چیئرمین جوائنٹ چیفس آف اسٹاف کمیٹی اور سروسز چیفس کی جانب سے فتح 4 کے کامیاب تربیتی تجربے پر شریک دستوں، سائنسدانوں اور انجینئرز کو مبارکباد دی گئی ہے۔
