برطانیہ (مانیٹرنگ ڈیسک) موسم سرما کے دوران جسم میں پانی کی کمی کا اشارہ دینے والی نشانیاں کون کونسی ہیں؟ اس حوالے سے طبی تحقیق میں ایسی نشانیاں سامنے آئی ہیں جو حیران کن ہیں۔
انٹرنیشنل میڈیا کے مطابق اکثر افراد سردیوں میں ڈی ہائیڈریشن کو محسوس نہیں کرتے کیونکہ ٹھنڈ کے باعث پیاس کا احساس کم ہوتا ہے۔ یہی وجہ ہے کہ آپ کو ان نشانیوں کے بارے میں جاننا چاہیے جو سرد موسم میں جسم میں پانی کی کمی کا اشارہ دیتی ہیں۔
جِلد خشک ہونا
سرد موسم کی روایتی خشکی سے ہٹ کر جسم میں پانی کی کمی سے جِلد کے مسائل کا مسلسل سامنا ہوتا ہے۔ اگر جِلد غیرمعمولی حد تک خشک ہو جائے اور لپ بام لگانے کے باوجود ہونٹ پھٹنے لگے تو یہ ڈی ہائیڈریشن کی نشانی ہوسکتی ہے۔
غیر معمولی نقاہت اور تھکاوٹ
ویسے تو سرد موسم میں اکثر افراد کو سستی محسوس ہوتی ہے مگر پانی کی کمی سے طاری ہونے والی تھکاوٹ یا نقاہت مختلف ہوتی ہے۔ جب جسم کو پانی کی کمی کا سامنا ہوتا ہے تو خون کا بہا گھٹ جاتا ہے اور بغیر کسی وجہ کے تھکاوٹ کا سامنا ہوتا ہے جبکہ توجہ مرکوز کرنا مشکل ہو جاتا ہے۔ آرام کرنے کے باوجود بھی حالت میں کوئی بہتری نہیں آتی۔
سر درد
موسم سرما میں کئی بار سر درد کا سامنا ٹھنڈ یا نزلہ زکام کی وجہ سے نہیں ہوتا، ڈی ہائیڈریشن سے بھی سر درد کا خطرہ بڑھتا ہے۔ ایسے سر درد کے ساتھ سر چکرانے کی علامت بھی سامنے آتی ہے۔ اگر آپ کو اکثر نتھنوں کے مسائل کا سامنا ہوتا ہے یا سانس لینے میں مشکل محسوس ہوتی ہے تو جسم میں پانی کی کمی سے ان کی علامات کی شدت بڑھ سکتی ہے۔
پیشاب کی رنگت میں تبدیلی
پیشاب کی رنگت سے جسم میں پانی کی سطح کا اندازہ لگایا جاسکتا ہے۔ گہرے زرد رنگ کا پیشاب خاص طور پر سرد موسم میں کم پانی پینے کا عندیہ دیتا ہے اگر سرد موسم میں معمول سے کم پیشاب آرہا ہو تو یہ بھی ڈی ہائیڈریشن کا نتیجہ ہوسکتا ہے۔
مسلز میں کھچاؤ
سرد موسم میں اکثر مسلز اکڑ جاتے ہیں مگر پانی کی کمی سے مسلز کے کھچا کا خطرہ بڑھتا ہے۔ مناسب مقدار میں پانی نہ پینے سے مسلز کے افعال متاثر ہوتے ہیں اور ان میں کھچا کا احساس سرد موسم کے معمول کے مسلز کے مسائل سے مختلف ہوتا ہے۔
گلا خشک ہونا اور خراش
مسلسل گلا خشک رہنا یا خراش محسوس ہونا، خاص طور پر گھر کے اندر، یہ بھی ڈی ہائیڈریشن کی ایک نشانی ہے۔
