افغانستان میں بچیوں کے سکول کھلوانے کیلئے محبوبہ سراج طالبان کے دفتر پہنچ گئیں

افغانستان(مانیٹرنگ ڈیسک) افغانستان میں بچیوں کے اسکول کھلوانے کیلئے سینئر افغان صحافی اور سماجی کارکن محبوبہ سراج طالبان حکومت کے ترجمان ذبیح اللہ مجاہد کے دفتر پہنچ گئیں۔

انٹرنیشنل میڈیا کے مطابق طالبان حکومت کے ترجمان سے ملاقات کے دوران محبوبہ سراج نے کہا کہ خدا کیلئے لڑکیوں کے اسکول کھول دو، افغانستان ایک ایسی نسل کا متحمل نہیں ہوسکتا جو اسکول ہی نہ گئی ہو۔ انہوں نے کہا کہ طاقت سے اقتدار حاصل تو کیا جا سکتا ہے مگر اسے برقرار نہیں رکھا جا سکتا، جب تک طالبان حکومت یہ مسئلہ حل نہیں کرتی دنیا ان کے خلاف ہی رہے گی اس موقع پر ذبیح اللہ مجاہد کا کہنا تھا کہ اگر اسکول کی لڑکیاں حکومت کے خلاف جائیں گی تو یہ معاشرے کو غیر مستحکم کر سکتا ہے۔طالبان ترجمان نے محبوبہ سراج کے تحفظات افغان حکومت تک پہنچانے کی یقین دہانی کرواتے ہوئے کہا کہ وہ صرف ترجمان ہیں، معاملے کو عمائدین تک پہنچادیں گے۔