بھارتی معروف سیاستدان ششی تھرور نے بھارتیہ جنتا پارٹی کو آڑے ہاتھوں لے لیا

ممبئی(مانیٹرنگ ڈیسک) بھارت کے معروف سیاستدان اور پارلیمنٹ میں کانگریس کے رکن ششی تھرور نے حکمران بھارتیہ جنتا پارٹی کو آڑے ہاتھوں لیتے ہوئے شدید تنقید کانشانہ بنا ڈالا ۔

انٹرنیشنل میڈیا کے مطابق پارلیمنٹ میں کانگریس کے رکن ششی تھرور نے کہا کہ 22 جنوری کو ایودھیا میں رام جنم بھومی مندر میں مورتی رکھنے کی تقریب میں انہیں مدعو نہیں کیا گیا ہے۔ حکمراں بھارتیہ جنتا پارٹی پر براہِ راست تنقید کرتے ہوئے ششی تھرور نے کہا کہ مذہب کسی بھی انسان کا ذاتی معاملہ ہے۔ حکومت کو ان معاملات میں ملوث نہیں ہونا چاہیے۔ مذہب کو سیاسی مقاصد کی تکمیل کے لیے بھی بروئے کار نہیں لانا چاہیے۔ ششی تھرور نے کہا کہ میں ان لوگوں کے ہاتھوں میں کھلونا نہیں ہوں جو اپنے سیاسی مقاصد اور اقتدار کے استحکام کے لیے لوگوں کے مذہبی جذبات سے کھلواڑ کرتے ہیں۔ ان کا کہنا تھا کہ کچھ لوگ رام جنم بھومی مندر میں مورتی نصب کرنے کے عمل کو سیاسی مقاصد کی تکمیل کے لیے استعمال کر رہے ہیں۔ میڈیا بھی ایسے لوگوں کے ہاتھوں میں کھلونا بنا ہوا ہے۔

ششی تھرور نے کہا کہ جو لوگ اقتدار ملنے پر بھی لوگوں کے مسائل حل کرنے میں ناکام رہتے ہیں وہ لوگوں کی توجہ ہٹانے کے لیے مذہب کو ہتھکنڈے کے طور پر استعمال کرتے ہیں۔ ان کا مزید کہنا تھا کہ جنہیں اقتدار ملا ہو انہیں کاروبار دوست ماحول یقینی بنانا چاہیے اور بے روزگاری ختم کرکے عوام کی بہبود یقینی بنانے پر توجہ دینی چاہیے۔ قومی سلامتی کے معاملات زیادہ اہم ہیں۔ ان پر زیادہ توجہ دی جائے۔