برطانیہ (مانیٹرنگ ڈیسک) ڈائٹنگ یا ورزش کے بغیر جسمانی وزن میں کمی کیسے لائی جاسکتی ہے؟ اس حوالے سے ماہرین کی جانب سے کی جانے والی تحقیق میں چونکا والا انکشاف سامنے آگیا ہے۔
انٹرنیشنل میڈیا کے مطابق سرد موسم میں 15 منٹ کی کپکپی کیلوریز جلانے کے لیے ایک گھنٹے کی ورزش کے برابر ہے۔ جسمانی وزن میں کمی کے لیے لوگ ڈائٹنگ کرتے ہیں، ورزشوں کے پروگرام کا حصہ بنتے ہیں یا ایسے ہی دیگر طریقوں کو اپناتے ہیں مگر ایک ایسا طریقہ بھی موجود ہے جس سے جسمانی وزن میں کمی لانا ممکن ہے اور کچھ کرنا بھی نہیں پڑتا، بس سردی کو برداشت کرنے کی ضرورت ہوتی ہے۔ یقین کرنا مشکل ہوگا مگر کپکپی سے بھی جسمانی وزن میں کمی لانا ممکن ہے۔
طبی ماہرین کے مطابق ہمارے جسم کے اندر بھوری اور سفید 2 اقسام کی چربی کا ذخیرہ ہوتا ہے۔ سفید چربی کو نقصان دہ چربی قرار دیا جاتا ہے کیونکہ یہ اس وقت جمع ہوتی ہے جب ہم غذا سے اتنی کیلوریز جزوبدن بنا لیتے ہیں جتنی جلا نہیں پاتے۔اس طرح وقت کے ساتھ جسمانی وزن میں اضافہ ہوتا ہے اور آپ موٹاپے کے شکار ہو جاتے ہیں جبکہ ذیابیطس ٹائپ 2 اور امراض قلب کا خطرہ بڑھتا ہے۔اس کے مقابلے میں بھوری چربی کو مفید قرار دیا جاتا ہے کیونکہ یہ جسم کو توانائی فراہم کرنے کا ذریعہ ہے اور میٹابولزم کو ریگولیٹ کرتی ہے۔
طبی ماہرین کے مطابق کم درجہ حرارت بھوری چربی کی مقدار بڑھانے میں مددگار ثابت ہوتا ہے۔2012ء کی ایک تحقیق میں بتایا گیا کہ جب سردی سے کپکپی طاری ہوتی ہے تو بھوری چربی کے ٹشوز زیادہ متحرک ہو جاتے ہیں یا یوں کہہ لیں کہ یہ چربی جلنے لگتی ہے۔اس طرح کیلوریز جلتی ہیں اور جسم کی اندرونی حرارت بڑھتی ہے۔2014 کی ایک تحقیق کے مطابق کپکپی سے ایک ہارمون Irisin متحرک ہوا ہے جو چربی گھلاتا ہے۔
