امریکی صدرجوبائیڈن کی انتخابی مہم کےدوران فلسطین کےحق میں نعرے

اٹلانٹا(ویب ڈیسک) امریکی صدر جوبائیڈن کی انتخابی مہم کے دوران فلسطینی حامی کارکن نے احتجاج کیا۔ عرب میڈیا کے مطابق امریکی شہر اٹلانٹا میں جوبائیڈن کی تقریر کے دوران فلسطین کی حمایت میں نعرے لگائے گئے۔ فلسطین کے حامی کارکن نے نعرے لگائے کہ صدر جو بائیڈن تم ایک آمر ہو، فلسطین میں نسل کشی ہو رہی ہے۔

غیر ملکی میڈیا کے مطابق صدر جو بائیڈن کی تقریر شروع ہونے کے کچھ ہی دیر بعد احتجاج کرنے والے شخص نے چیخ کر کہا کہ تم کیا کرنے جا رہے ہو، ہزاروں فلسطینی جان سے ہاتھ دھو بیٹھے ہیں۔ دوسری جانب غزہ شہر کے علاقے بیت لاہیہ میں اسرائیلی طیارے کی بم باری کے نتیجے میں متعدد افراد شہید اور زخمی ہو گئے۔

عرب میڈیا کے مطابق ابو نصر خاندان کے گھر پر بمباری کی گئی ہے۔ غیر ملکی میڈیا کے مطابق 7 اکتوبر سے اب تک فلسطینی شہدا کی تعداد 30 ہزار 960 ہو گئی ہے جب کہ اسرائیلی حملوں سے اب تک 72 ہزار 524 فلسطینی زخمی ہوئے ہیں۔