نکسل باغیوں نے بھارتی فوجی ٹرک کو بم سے اڑا دیا‘ 2 کمانڈوز ہلاک

لاہور(انٹرنیشنل ڈیسک)بھارت میں بغاوت کی راکھ بھڑکتے بھڑکتے بہت بڑا الاثو بن چکی ہے گزشتہ روز بھارتی ریاست چھتیس گڑھ میں بھی ایسا ہی واقعہ پیش آیا جس سے ان شعلوں کو مزید بھڑکنے میں مدد ملی۔ ہوا یوں کہ نکسل باغیوں کے حملے میں بھارتی نیم فوجی دستے سینٹرل ریزرو پولیس فورس کی کمانڈو بٹالین کے ٹرک پر دیسی ساختہ بم سے حملہ کیا گیا۔بھارتی میڈیا کے مطابق بم دھماکے میں ہلاک ہونے والے اہلکاروں کی شناخت 29 سالہ شیلندر اور 35 سالہ وشنو کے ناموں سے ہوئی جو آر یس سی آر پی ایف کمانڈو بٹالین فار ریزولوٹ ایکشن کوبرا کی 201 ویں بٹالین کا حصہ تھے۔

بھارتی خبر رساں ادارے ”پی ٹی آئی“ کے مطابق نکسلیوں نے ٹرک کو دیسی ساختہ بم سے اڑانے کا منصوبہ بنا رکھا تھا۔حملے کے نتیجے میں فوجی ٹرک مکمل طور پر تباہ ہوگیا اور اس میں آگ بھڑک اُٹھی۔ حملہ کے بعد نکسلی باغی بھارتی فوج کا اسلحہ بھی چھین کر فرار ہو گئے۔فوجی ٹرک پر بم دھماکے کی اطلاع ملتے ہی مزید نفری کو طلب کرلیا گیا۔اب حملہ آوروں کی گرفتاری کے لیے علاقے میں سرچ آپریشن شروع کردیا گیا ہے تاہم اب تک کوئی گرفتاری عمل میں نہیں لائی جا سکی۔یاد رہے کہ بھارتی ریاست چھتیس گڑھ میں نکسل جنگجو بھارت سے آزادی کے لیے مسلح جدوجہد کر رہے ہیں اور مقامی وسائل سے دارالحکومت کو فائدہ پہنچانے کے بجائے اسی علاقے میں تعمیر و ترقی کا مطالبہ کررہے ہیں۔