سوڈانی فوج کے سربراہ پر ڈرون حملہ، بال بال بچ گئے

خرطوم(مانیٹرنگ ڈیسک) سوڈانی فوج کے سربراہ پر تقریب کے دوران ڈرون حملے میں بال بال بچ گئے۔سوڈانی فوج کے ترجمان نے جنرل عبدالفتح برہان کے ڈرون حملے میں بال بال بچنے کی تصدیق کی ہے۔

انٹرنیشنل میڈیا کے مطابق سوڈانی فوج کے ترجمان نے بتایا کہ فوج کی گریجویشن تقریب کے دوران جابیت بیس پر دو ڈرون حملے کیے گئے جس کے نتیجے میں 5 افراد ہلاک ہوئے جب کہ تقریب میں فوج کے سربراہ جنرل فتح بھی موجود تھے جو حملے میں بال بال بچ گئے۔ فوجی ترجمان نے بتایا کہ ڈرون حملوں کے بعد علاقہ فوج کے کنٹرول میں ہے۔

حملے کے بعد گفتگو کرتے ہوئے جنرل عبدالفتح نے کہا کہ وہ بات چیت کے امکان کو مسترد کرتے ہیں اور اپنے مخالفین کو کچل دیں گے، اب کوئی بات چیت ہوگی اور نہ وہ ہتھیار ڈالیں گے۔ دوسری جانب آر ایس ایف کے قانونی مشیر کا کہنا ہے کہ ان کا گروپ اس کارروائی کا ذمہ دار نہیں اور وہ آئندہ ماہ امریکا کی ثالثی میں ہونے والی بات چیت کے لیے تیار ہے۔ فوجی ترجمان نے الزام عائد کیا کہ پیرا ملٹری ریپڈ فورس (آر ایس ایف) گزشتہ 16 ماہ سے ملک پر کنٹرول کرنے کی جدوجہد کررہی ہے۔