جاپان حکومت کا نیا حکمنامہ، سائیکل چلاتے ہوئے موبائل فون استعمال کرنیوالوں کی شامت آگئی

ٹوکیو (مانیٹرنگ ڈیسک) جاپان حکومت نے نئی قانون سازی کرتے ہوئے نیا حکمنامہ جاری کر دیا جس کے بعد سائیکل چلاتے ہوئے موبائل فون استعمال کرنے والوں کی شامت آگئی ہے۔

انٹرنیشنل کے مطابق جاپانی حکومت کی جانب سے کی گئی نئی قانون سازی کے تحت سائیکل چلاتے ہوئے موبائل فون استعمال کرنے والوں کو جرمانے کے ساتھ ساتھ اب کم از کم 6 ماہ کے لیے جیل بھیجا جائے گا۔ رپورٹ کے مطابق نئے قوانین کے تحت حادثات کا باعث بننے والے سائیکل سواروں کو 1500 سے 2 ہزار ڈالر تک جرمانہ ہوگا جب کہ 6 ماہ سے ایک سال تک جیل بھیجا جاسکے گا۔

جاپان کے مقامی میڈیا کے مطابق ملک میں ہونے والے ٹریفک حادثات میں کمی دیکھنے میں آئی ہے مگر سائیکل سے ہونے والے حادثات میں اضافہ ہوا ہے اور صرف 2023 میں 72 ہزار سے زائد سائیکلوں کو حادثات پیش آئے۔ 2021 میں کورونا وبا کے بعد سے جاپان میں سائیکلوں کے استعمال میں اضافہ ہوا ہے اور لوگوں نے پبلک ٹرانسپورٹ کو استعمال کرنا کم کردیا تھا جس کے بعد سائیکلوں سے ہونے والے ٹریفک حادثات میں اضافہ ہوا۔