مقبوضہ کشمیرمیں بھارتی فوج کی موجودگی سےطلباء کی تعلیم بری طرح متاثر

سری نگر(ویب ڈیسک) مقبوضہ کشمیرمیں بھارتی فوج کی بھاری تعداد میں موجودگی سے طلبا ء کی تعلیم  بری طرح متاثر ہوئی ہے ۔ کشمیر میڈیا سروس کی رپورٹ کے مطابق بھارتی فوجی طلباء کے لیے تعلیم کا حصول آسان بنانے کی بجائے انہیں ہراساں کرتے اوران کی تذلیل کرتے ہیں جبکہ مقبوضہ علاقے میں فلاح عام ٹرسٹ کے زیر انتظام سینکڑوں اسکولوں پر پابندی ہے۔

رپورٹ کے مطابق  سکولوں میں مسلمان طلباء کو ہندو بجن گانے اور سوریہ نمسکار کرنے پر مجبور کیا جاتا ہے اور مودی حکومت کی تعلیمی پالیسی آر ایس ایس کے نظریے کی عکاس ہے۔ مقبوضہ کشمیر کے ضلع اسلام آباد کے رہائشی جاوید احمد بٹ پر منشیات فروشی کا جھوٹا الزام عائد کر کے اس کا مکان بھی قرق کر دیا گیا ہے جس کی قیمت 50 لاکھ سے زائد بتائی گئی۔

ایجنسیز اور پولیس منشیات فروشی کے الزامات کی آڑ میں آزادی پسندوں کو نشانہ بنا رہی ہیں اور اسی سلسلے میں بڈگام میں بھارتی فوجیوں نے علاقے کا محاصرہ کر کے تلاشی بھی لی۔