دوسری مرتبہ صدر منتخب ہونے پر ٹرمپ کو شہباز شریف سمیت عالمی رہنمائوں کی مبارکباد

واشنگٹن(مانیٹرنگ ڈیسک) صدارتی الیکشن جیتنے اور دوسری مرتبہ امریکی صدر منتخب ہونے پر عالمی رہنماوں کی جانب سے ڈونلڈ ٹرمپ کو مبارک باد اور خیر سگالی کے پیغامات ملنے کا سلسلہ جاری ہے۔

تفصیلات کے مطابق وزیراعظم پاکستان شہباز شریف، برطانوی وزیراعظم سر کیئر اسٹارمر، اطالوی وزیراعظم جارجیا میلونی اور بھارتی وزیراعظم نریندر مودی کی جانب ڈونلڈ ٹرمپ کو صدارتی الیکشن میں کامیابی پر مبارکباد دی گئی اور نیک خواہشات کا اظہار کیا گیا۔ اس کے علاوہ ترک صدر رجب طیب اردوان، قطر کے امیر شیخ تمیم بن حمد آل ثانی، مصری صدر فتح السیسی اور فرانسیسی صدر ایمانویل میکخواں کی جانب سے بھی ٹرمپ کو مبارک بعد دی گئی۔

وزیراعظم شہباز شریف نے سوشل میڈیا سائٹ ایکس پر ڈونلڈ ٹرمپ کو صدارتی الیکشن میں کامیابی پر مبارکباد دیتے ہوئے لکھا کہ ‘نئی امریکی انتظامیہ کے ساتھ تعلقات مزید مستحکم کرنے کے لیے پرعزم ہوں’۔ چیئرمین پیپلزپارٹی بلاول بھٹو زرداری نے ڈونلڈ ٹرمپ کو مبارکباد دیتیہوئے لکھا کہ ‘امریکی عوام نے ٹرمپ اور ان کی ٹیم کو شاندار فتح دی، یہ جنگ مخالف مینڈیٹ اور کامیابی ہے’۔ ترجمان چینی وزارت خارجہ کی جانب سے جاری بیان میں کہا گیا کہ چین باہمی احترام کی بنیاد پر امریکا کے ساتھ کام جاری رکھے گا، امریکاکے لییچین کی پالیسی میں کوئی تبدیلی نہیں ہے۔