جنگ بندی معاہدہ ختم، فلسطینی مزاحمت کاروں کا حملہ، 2اسرائیلی فوجی ہلاک، متعدد زخمی
فائرنگ کا تبادلہ کچھ منٹوں تک جاری رہا جس دوران ایک اور اسرائیلی فوجی ہلاک اور 8 زخمی ہوگئے جبکہ اسرائیلی فوج کی فائرنگ سے فلسطینی مزاحمت کار بھی شہید ہوگیا: میڈیا
رام اللہ(مانیٹرنگ ڈیسک) اسرائیل اور فلسطین کے درمیان ہونے والا جنگ بندی معاہدہ ختم، فلسطینی مزاحمت کاروں نے حملہ کر کے 2اسرائیلی فوجیوں کوہلاک جبکہ متعدد کو زخمی کر دیا ہے۔
انٹرنیشنل میڈیا کے مطابق ایک فلسطینی مزاحمت کار نے مقبوضہ مغربی کنارے کے گاؤں تیاسیر کے قریب اسرائیلی چیک پوائنٹ میں داخل ہوکر فائرنگ کردی۔ میڈیا کے مطابق فوج کی ابتدائی تحقیقات میں بتایا گیا ہے کہ فلسطینی مزاحمت کار صبح 6 بجے فوجی چوکی میں داخل ہونے میں کامیاب ہوا جس کے بعد اس نے اسرائیلی فوجیوں پر فائرنگ شروع کردی۔
اسرائیلی فوجی چوکی کے احاطے میں11 فوجی اور ان کا کمانڈر تعینات تھے، فلسطینی مزاحمت کا ر رات میں چیک پوائنٹ کے نزدیک پہنچا اور صبح جب 2 فوجی چیک پوائنٹ کھولنے کے لیے باہر نکلے تو مزاحمت کار نے ان پر فائرنگ کردی جس کے نتیجے میں ایک اسرائیلی فوجی موقع پر ہی ہلاک ہوگیا۔میڈیا کا مزید بتانا ہے کہ فائرنگ کا تبادلہ کچھ منٹوں تک جاری رہا جس دوران ایک اور اسرائیلی فوجی ہلاک اور 8 زخمی ہوگئے جبکہ اسرائیلی فوج کی فائرنگ سے فلسطینی مزاحمت کار بھی شہید ہوگیا۔
