مودی کی چالاکیاں کام کر گئیں، روس بھارت کو کونسے جدید طیارے دینے والا ہے؟ تفصیل سامنے آگئی

نئی دہلی (مانیٹرنگ ڈیسک) بھارتی وزیراعظم نریندرا مودی کی چالاکیاں کام کر گئی ہیں ، روس اب بھارت کو کونسے جدید طیارے دینے والا ہے؟ اس حوالے سے تمام تر تفصیل سامنے آگئی ہے۔

انٹرنیشنل میڈیا کے مطابق روسی اور بھارتی حکام نے گزشتہ روز بتایا کہ روس کی جانب سے بھارتی فضائیہ کے لیے جدید ففتھ جنریشن لڑاکا طیارہ ایس یو 57 بھارت میں ہی تیار کرنے کی پیشکش کی گئی ہے۔ میڈیا کے مطابق ہتھیار برآمد کرنے والے روس کے سرکاری ادارے روسوبورون ایکسپورٹ کے ترجمان کے مطابق اگر بھارت یہ پیشکش قبول کرتا ہے تو بھارت میں طیاروں کی تیاری رواں سال سے ہی شروع ہوسکتی ہے۔

انٹرنیشنل میڈیا نے روسی اور بھارتی ذرائع کا حوالہ دیتے ہوئے کہا ہے کہ بھارت کے سرکاری طیارہ ساز ادارے ہندوستان ایروناٹکس لمیٹڈ کے اہلکاروں کے ساتھ بات چیت میں روس کی جانب سے ایس یو57 کی بھارت میں تیاری کی غیر رسمی پیشکش کی گئی۔میڈیا کے مطابق بھارتی وزارت دفاع نے فوری طور پر اس حوالے سے کوئی ردعمل نہیں دیا۔

روسوبورون ایکسپورٹ کے ترجمان نے بنگلورو میں ہونے والے ائیر شو کے موقع پر صحافیوں کو بتایا کہ ٹیکنالوجی کی مکمل منتقلی کے ساتھ بھارت میں ان طیاروں کی تیاری اس بات کو یقینی بنائے گی کہ روس پر مغربی پابندیوں سے طیارے کی پیداوار متاثر نہ ہو۔ ترجمان نے کہا کہ ایس یو 30 طیاروں کی بھارتی پروڈکشن لائن میں بہتری کے بعد ایس یو 57 طیارے تیار کیے جاسکتے ہیں۔ خیال رہے کہ روسی ایس یو57 طیارے کو امریکا کے جدید ترین ففتھ جنریشن لڑاکا طیارے ایف 35 کا مدمقابل سمجھا جاتا ہے۔