وارسا(مانیٹرنگ ڈیسک) پولینڈ مگ 29لڑاکا طیارے کے بدلے یوکرین سے کیا لے گا؟ اس حوالے سے انٹرنیشنل میڈیا کا دعویٰ سامنے آنے کے بعد یورپی ممالک میں ہلچل مچ گئی ہے۔
انٹرنیشنل کے مطابق پولینڈ کے وزیرِ دفاع ولادیسلاو کوسینیاک کامیژ نے کہا کہ مِگ طیارے اپنی سروس لائف کے اختتامی مرحلے پر پہنچ چکے ہیں، جس کے باعث انہیں پولش فوج سے ہٹا دیا جائے گا، اور ہم ان کے یوکرین کو منتقلی سے متعلق بات چیت کر رہے ہیں۔ ان کے مطابق اس معاہدے میں خصوصا ڈرونز اور میزائلوں کے شعبے میں ٹیکنالوجی کے تبادلیکا امکان بھی شامل ہے جو یوکرین سے پولینڈ کو منتقل کی جا سکتی ہے۔ رپورٹس کے مطابق پولینڈ نے روس کے 2022 کے حملے کے بعد اپنے متعدد مِگ-29 طیارے یوکرین کے حوالے کیے تھے اور اِس وقت اس کے پاس ایسے 14 طیارے موجود ہیں۔
وزیرِ دفاع نے کہا کہ اس حوالے سے مذاکرات جاری ہیں اور ہم انہیں جلد از جلد حتمی شکل دینے کے لیے پرعزم ہیں۔ انہوں نے مزید بتایا کہ پولینڈ پہلے ہی ڈرون آپریشنز میں یوکرین کی عسکری مہارت سے فائدہ اٹھا رہا ہے۔ ڈرونز کے معاملے میں یوکرینی دنیا کے بہترین ماہرین میں شمار ہوتے ہیں، خصوصا ان ممالک میں جن کے ساتھ ہمارے اچھے تعلقات ہیں۔
