نیپال میں ہندو انتہاء پسندوں کی جانب سے مسجد کی بے حرمتی، حالات کشیدہ، پولیس آپے سے باہر
نیپال (مانیٹرنگ ڈیسک) نیپال اور بھارت کی سرحد سے متصل شہر برگنج میں ہندو انتہاء پسندوں کی جانب سے مسجد کی بے حرمتی پر حالات کشیدہ ہو گئے جس کے بعد مقامی پولیس آپے سے باہر ہو گئی ہے۔
انٹرنیشنل میڈیا کے مطابق مسجد کی بے حرمتی کیخلاف عوام سڑکوں پر نکل آئے اور احتجاج ریکارڈ کرایا، اس دوران پولیس نے مظاہرین کو منتشر کرنے کے لیے آنسو گیس کی شیلنگ کردی جبکہ کئی مظاہرین کو حراست میں لے لیا۔ حکام نے دارالحکومت کٹھمنڈو سے 130 کلومیٹر جنوب میں واقع اس سرحدی شہر میں حالات کشیدہ ہونے کے بعد کرفیو نافذ کردیا۔
انتظامیہ کی جانب سے جاری احکامات کے مطابق شہریوں کو سڑکوں پر نکلنے، اجتماعات اور مظاہروں کی اجازت نہیں ہوگی جبکہ خلاف ورزی کرنے والوں کے خلاف سکیورٹی فورسز کو فائرنگ کے اختیارات بھی دے دیے گئے ہیں۔ حکام کے مطابق اتوار کے روز ہندو انتہاپسند عناصر نے مسجد پر دھاوا بولا اور لوٹ مار کی جس کے بعد مقامی مسلمان شدید غم و غصے کا شکار ہیں۔
