مقبوضہ کشمیر کا معاملہ، سابق سربراہ ”را” نے مودی کا گھنائونا چہرہ بے نقاب کر دیا

نئی دہلی (مانیٹرنگ ڈیسک) مقبوضہ کشمیر کے حوالے سے بھارتی خفیہ ایجنسی ”را” کے سابق سربراہ اے ایس دولت نے وزیراعظم نریندرا مودی کا گھنائونا چہرہ بے نقاب کر دیا ہے۔

انٹرنیشنل میڈیا کے مطابق بھارتی خفیہ ایجنسی ”را” کے سابق سربراہ اے ایس دولت نے کشمیریوں میں مایوسی کا ذکر چنائی میں منعقدہ لیٹریچر فیسٹول میں کیا۔انہوں نے کہا کہ کشمیر میں موجودہ سیاسی صورتحال میں بے بسی کا احساس غالب ہے اور نئی دہلی کو کشمیر اور کشمیریوں کے حالات کی کوئی خاص فکر نہیں۔ انہوں نے کہا کہ کشمیر اس وقت جمود کا شکار ہے اور کشمیری صرف امید کے سہارے زندہ ہیں۔

اے ایس دولت کا کہنا تھا کہ واجپائی کے دور کی بی جے پی اور نریندر امودی کی بی جے پی میں زمین آسمان کا فرق ہے، سابق وزیراعظم اٹل بہاری واجپائی کشمیر کے مسئلے کے حل میں سنجیدہ دلچسپی رکھتے تھے جب کہ موجودہ مودی حکومت کو اس سے زیادہ سروکار نہیں ہے۔ کشمیر میں آرٹیکل 370 کی منسوخی پر بات کرتے ہوئے را کے سابق سربراہ نے کہا کہ کشمیریوں سے یہ علامتی سہارا بھی چھین لیا گیا ہے، آرٹیکل 370کے خاتمے کے بعد جس بڑے احتجاج کی توقع تھی وہ نہیں ہوا بلکہ کشمیری خاموش ہوگئے اور یہی خاموشی خوفناک ہے کیونکہ اس کے نتائج کا اندازہ نہیں لگایا جا سکتا۔