انوارالحق کاکڑآٹھویں نگراں وزیراعظم،گارڈ آف آنر پیش کردیا گیا

اسلام آباد(کھوج نیوز ) انوارالحق کاکڑآٹھویں نگراں وزیراعظم،گارڈ آف آنر پیش کردیا گیا ،بلوچستان سے تعلق رکھنے والے انوار الحق کاکڑ آج ملک کے آٹھویں نگراں وزیراعظم بن گئے، نگراں وزیراعظم انوارا لحق کو پرائم منسٹر ہاؤس میں گارڈ آف آنر دیا گیا۔ نگراں وزیراعظم نے تینوں مسلح افواج کے چاک و چوبند دستوں سے سلامی لی، سلامی کے بعد نگراں وزیراعظم انوارالحق نے گارڈ آف آنر کا معائنہ کیا۔

اس سے قبل ایوان صدر میں ہونے والی پر وقار تقریب میں صدر مملکت عارف علوی نے انوارالحق کاکڑ سے حلف لیا، تقریب حلف برداری میں سبکدوش ہونے والے وزیراعظم شہباز شریف بھی شریک ہوئے۔ چیئرمین سینیٹ، اسپیکر قومی اسمبلی، تینوں مسلح افواج کے سربراہ، صوبائی گورنرز بھی تقریب حلف برداری میں شریک تھے۔