کور کمانڈر ہیڈ کوارٹرز میں کابینہ کا اجلاس ہوا یا افطار کا اہتمام کیا گیا؟ بیرسٹر سیف نے بتا دیا

پشاور(کھوج نیوز) کور کمانڈر ہیڈ کوارٹرز میں کابینہ کا باضابطہ اجلاس ہوا یا افطار کا اہتمام کیا گیا ؟ اس حوالے سے وزیراعلیٰ کے پی کے مشیر برائے اطلاعات بیرسٹر محمد علی سیف نے بتا دیا۔

تفصیلات کے مطابق بیرسٹر سیف کا کہنا تھاکہ کورکمانڈر ہیڈکوارٹرز میں افطار کا اہتمام کیا گیا تھا جہاں عسکری حکام کے ساتھ وزیر اعلیٰ کے پی اور کابینہ کی میٹنگ ہوئی اور حکام نے انہیں سکیورٹی صورتحال پر بریفنگ دی۔ انہوں نے کہا کہ کورکمانڈر ہیڈکوارٹرز میں کابینہ کا باضابطہ اجلاس نہیں ہوا بلکہ الیون کور میں افطار کی دعوت روایات کے مطابق قبول کی۔ ان کا کہنا تھاکہ الیون کور میں سکیورٹی معاملات سے متعلق بریفنگ روم مختص ہے، سکیورٹی صورتحال پر فوج سے فعال رابطوں اور تعاون پر یقین رکھتے ہیں، سکیورٹی بریفنگ کے بعد سوال وجوابات کا سیشن بھی ہوا۔ بیرسٹر سیف کا کہنا تھاکہ وزیر اعلی علی امین گنڈاپور نے سیشن سے خطاب بھی کیا اور سکیورٹی صورتحال اور حکومتی اقدامات پر بات کی۔ انہوں نے مزید کہا کہ ہم اپنی فوج کے ساتھ نہیں بیٹھیں گے تو کیا بھارتی فوج کے ساتھ بیٹھیں گے؟ چند لوگ افواہیں پھیلا کر اپنی سیاست دوبارہ زندہ کرنے کی ناکام کوششیں کررہے ہیں۔