کیا ای ایم ایس سے انتخابی نتائج کو کوئی خطرہ لاحق ہوسکتا ہے؟ الیکشن کمیشن نے بڑا بیان داغ دیا

اسلام آباد(کھوج نیوز) کیا ای ایم ایس سے انتخابی نتائج کی ترسیل اور ٹیبولیشن کو کوئی خطرہ لاحق ہو سکتا ہے؟ اس حوالے الیکشن کمیشن کی جانب سے بڑا بیان داغ دیا گیا ہے۔

تفصیلات کے مطابق الیکشن کمیشن آف پاکستان کے ترجمان کا کہنا تھا کہ الیکشن کمیشن کا تمام آپریشنل اور آئی ٹی نظام تسلی بخش انداز سے کام کر رہا ہے اور کمیشن کو عام انتخابات 2024 کے انعقاد کے لیے جاری مراحل میں کسی قسم کی رکاوٹ اور دشواری کا سامنا نہیں ہے۔ ترجمان الیکشن کمیشن کے مطابق کمیشن نے ایک خود کار اور جدید الیکشن مینجمنٹ سسٹم تیار کیا ہے جسے پریزائیڈنگ افسران سے ریٹرننگ افسران تک انتخابی نتائج کی ترسیل اور مرتب کرنے کے لیے استعمال کیا جائے گا، اس حوالے سے تمام تیاریاں مکمل ہیں اور اس خود کار نظام کی متعدد دفعہ ٹیسٹنگ بھی ہو چکی ہے۔

ترجمان نے مزید وضاحت کی کہ ای ایم ایس (EMS) کا بنیادی مقصد الیکشن نتائج کی ترسیل اور ٹیبولیشن مرتب کر نا ہے، اس سسٹم کا استعما ل صرف پولنگ ڈے کے دن ہوگا، فی الوقت یہ کہنا کہ ای ایم ایس ناکام ہوگیا ہے جبکہ اسے ابھی آپریشنلائز نہیں کیا گیا، من گھڑت اورغیر سنجیدہ ہے۔ ترجمان الیکشن کمیشن کے مطابق ای ایم ایس سے انتخابی نتائج کی ترسیل اورٹیبولیشن کو کوئی خطرات لاحق نہیں ہیں اور الیکشن کمیشن عام انتخابات 2024 کے لیے اپنی تیاریوں اور اس میں الیکشن مینجمنٹ سسٹم کے استعمال سے مکمل طور پر مطمئن ہے۔اس حوالے سے بعض حلقوں میں سامنے آنے والے خدشات اور اندیشے بے بنیاد ہیں۔

ترجمان الیکشن کمیشن نے کہا کہ ای ایم ایس(EMS) سسٹم میں ریٹرننگ آفیسروں کی معاونت کے لیے کچھ اضافی فنکشن بھی شامل کیے گئے ہیں تاکہ انتخابات کے ابتدائی مراحل کے دوران بھی ڈیٹا کو آئندہ استعمال کے لیے محفوظ کیا جاسکے تاہم دور دراز علاقہ جات جہاں انٹرنیٹ کینکٹیوٹی کے مسائل سامنے آئے، وہاں پر ریٹرننگ افسران کو نامزد امیدواروں کی فہرستیں الیکشن کمیشن، صوبائی الیکشن کمشنر، علاقائی الیکشن کمشنر اور ضلعی الیکشن کمشنر کو بھجوانیمیں کچھ سرسری دشواریاں پیش آئی ہیں، کیونکہ الیکشن کمیشن نے EMS میں یہ اضافی فنکشن صرف اور صرف ریٹرننگ آفیسرو ں کی معاونت لے لیے مہیا کیے ہیں۔