مظاہر نقوی مس کنڈکٹ کے مرتکب قرار

اسلام آباد(کھوج نیوز) سپریم کورٹ کے سابق جج مظاہر نقوی کو سپریم جوڈیشل کونسل نے مس کنڈکٹ کے مرتکب قرار دیتے ہوئے اپنی رائے منظوری کیلئے صدر مملکت کو بھجوا دی ہے۔

تفصیلا تکے مطابق سپریم جوڈیشل کونسل نے ججز کوڈ آف کنڈکٹ کی شق نمبر 5 میں ترمیم کی ہے۔ سپریم جوڈیشل کونسل کے اعلامیے میں بتایا گیا ہے کہ سپریم کورٹ اور ہائی کورٹ کے ججز پر الزامات لگا کر ان کی تشہیرکی گئی،کئی ججز نے اپنے اوپر لگائے گئے الزامات پر تشویش کا اظہار کیا اور ججز کا مؤقف ہے کہ بے بنیاد الزامات پر جواب سے ججز کوڈ آف کنڈکٹ کی شق 5 کی خلاف ورزی ہوگی، کونسل مشاورت کے بعد اس نتیجے پر پہنچی کہ بے بنیاد الزامات کا جواب دینے سے شق 5 کی خلاف ورزی نہیں ہوتی، ججز کی تشویش کے باعث ججز کوڈ آف کنڈکٹ کی شق 5 میں ترمیم کی گئی ہے۔

سپریم جوڈیشل کونسل کے اعلامیے میں یہ بھی بتایا گیا ہے کہ سپریم جوڈیشل کونسل نے ججز کے خلاف 6 مختلف شکایات کا جائزہ لیا، 6 میں سے 5 شکایات میں ایسا کوئی مواد نہیں تھا جس پرکونسل کارروائی کرے۔ اعلامیے کے مطابق کونسل نے بلوچستان ہائی کورٹ کے ایک جج کے خلاف شکایت پر جج کو نوٹس جاری کیا ہے اور نوٹس کا جواب جمع کرانے کے لیے 14 دن کا وقت دیا ہے۔