وزیر اعلیٰ کے پی کے علی امین گنڈا پور پھر پھنس گئے، ناقابل ضمانت وارنٹ گرفتاری جاری

اسلام آباد(کھوج نیوز) وزیراعلیٰ خیبرپختونخوا (کے پی کے ) علی امین گنڈا پور ایک بار پھر پھنس گئے ہیں، انسداد دہشت گردی عدالت نے ان کے ناقابل ضمانت وارنٹ گرفتاری جاری کر دیئے ہیں۔

تفصیلات کے مطابق انسدادِ دہشت گردی عدالت کے جج طاہر عباس سپرا نے پاکستان تحریک انصاف کے بانی عمران خان اور دیگر کیخلاف تھانہ سنگجانی اور تھانہ آئی 9 میں درج مقدمات میں سماعت کا حکم نامہ جاری کیا۔ عدالت نے ایم این اے راجہ خرم نواز ‘ حیدربن مسعود، عمر تنویر بٹ ‘ راجہ ماجد حسین اور علی امین گنڈا پور کے ناقابل ضمانت وارنٹ گرفتاری جاری کر دیئے ہیں۔

واضح رہے کہ عدالت نے ملزمان کی حاضری سے استثنا کی درخواست مسترد کردیں، حیدر بن مسعود اور علی امین گنڈا پور کی جانب سے الگ الگ استثنا کی درخواستیں جمع کرائی گئیں تھیں۔ تحریری فیصلے میں کہا گیا کہ حیدر بن مسعود کی جانب سے درخواست میں مؤقف اختیار کیا گیا ہے کہ وہ بیمار ہیں، درخواست کے ساتھ کوئی میڈیکل سرٹیفیکیٹ منسلک نہیں کیا گیا۔ تحریری فیصلے میں کہا گیا کہ علی امین گنڈا پور نے درخواست میں مؤقف اختیار کیا کہ وہ شہر سے باہر ہیں، اس سلسلے میں کوئی تفصیل فراہم نہیں کی گئی ہے۔