سی ٹی ڈی پنجاب کی کارروائی، اسامہ بن لادن کا قریبی ساتھ گرفتار

لاہور(کھوج نیوز) سی ٹی ڈی پنجاب کی دبنگ کارروائی، القاعدہ کے بانی و سربراہ اسامہ بن لادن کے قریبی ساتھی کو گرفتار کرلیا ، امین الحق کو کہاں سے گرفتار کیا گیا ؟ رپورٹ سامنے آگئی۔

تفصیلات کے مطابق سی ٹی ڈی پنجاب نے خفیہ اطلاعات پر کارروائی کرتے ہوئے القاعدہ کے بانی و سربراہ اسامہ بن لادن کے قریبی ساتھی امین الحق کو گجرات سے گرفتار کرلیا ہے۔ سی ٹی ڈی پنجاب کے ترجمان کا کہنا تھا کہ دہشت گرد امین الحق القاعدہ کا سرکردہ جنگجو ہے جسے انٹیلی جنس معلومات کی بنیاد پر آپریشن کے بعد گرفتار کیا گیا۔ ترجمان کا بتانا ہے کہ دہشت گرد امین الحق کا نام اقوام متحدہ کی عالمی دہشت گردوں کی فہرست میں بھی شامل ہے۔ گرفتاری کا مقدمہ درج کر کے مزید تفتیش شروع کردی گئی ہے۔

لاہور میں ڈی آئی جی سی ٹی ڈی عثمان اکرم گوندل نے کہا کہ دہشت گرد 2007 میں گرفتار ہوا تھا اور 4 سال سزا کاٹی تھی، دشمن ملک کی ایجنسی نے اس پر بہت پروپیگنڈا کیا تھا، یہ دہشت گرد اگست 2021 سے افغانستان میں دکھائی دیا تھا جو حال ہی میں پاکستان داخل ہوا، اس سطح کا دہشتگرد پاکستان میں کیا کر رہا تھا تفتیش کر رہے ہیں۔

انہوں نے کہا کہ بین الاقوامی سطح پر امین الحق اسامہ بن لادن کا سیکیورٹی سپروائزر کے طور پر جانا جاتا تھا، اس طرح کا کوئی دہشتگرد آتا ہے تو اس کے خلاف کارروائی ہوگی۔ اس دہشت گرد کے پاس پاکستان کا آئی ڈی کارڈ بھی ہے، اس دہشتگرد کے شناختی کارڈ پر لاہور اور ہری پور کے ایڈریس درج ہیں، یہ پاکستان میں کیسے آیا اور کس آئی ڈی سے ٹریول کیا، تفتیش کر رہے ہیں۔ ڈی آئی جی عثمان اکرم کا کہنا تھا کہ جو کیس اس دہشت گرد پر رجسٹرڈ کیا گیا ہے وہ سزا اس کو بھگتنی پڑے گی۔