تفتیش کا پہلا مرحلہ، بانی پی ٹی آئی عمران خان اور لاہور پولیس میں تلخ جملوں کا تبادلہ

راولپنڈی (کھوج نیوز) بانی پی ٹی آئی عمران خان سے لاہور پولیس کی تفتیش کا پہلار مرحلہ مکمل ہو گیا ہے جبکہ سابق وزیراعظم نے لاہور پولیس سے تعاون کرنے کیلئے صاف جواب دیا ہے۔

تفصیلات کے مطابق ذرائع نے بتایا ہے کہ لاہور میں درج 9 مئی کے مقدمات کی تفتیش کے دوران لاہور پولیس نے بانی پی ٹی آئی سے مختلف سوالات کیے۔ بانی پی ٹی آئی نے سوالات کے جواب دینے سے انکار کیا اور کہا کہ پولیس پر اعتبار نہیں۔ تفتیشی افسر نے کہا کہ آپ تعاون کریں ہم آپ کے ساتھ انصاف کریں گے۔ ذرائع کا کہنا ہے کہ ڈی ایس پی جاوید آصف کی یقین دہانی پربانی پی ٹی آئی نے15 منٹ تک سوالات کے جوابات دیے۔

ذرائع کے مطابق پنجاب فارنزک ٹیم نے پولی گرافک، وائس میچنگ اور فوٹو گرامیٹری ٹیسٹ کرنے تھے۔ ذرائع کے مطابق تفتیش کے دوران بانی پی ٹی آئی نے پنجاب فارنزک ٹیم کے ماہرین کو 3 ٹیسٹ دینے سے انکار کردیا اور کہا کہ بہت سے تفتیشی اداروں کے زیرتفتیش ہوں، فی الحال کوئی ٹیسٹ نہیں کراں گا، اس حوالے سے بعد میں پولیس کو وقت دوں گا۔