پی ٹی آئی رہنما رئوف حسن کے جسمانی ریمانڈ میں 3 روز کی توسیع
سوشل میڈیا پر بنائے گئے جعلی اکائونٹس ملے، رئوف حسن ٹیم کی سربراہی کرتے ہیں: ایف آئی اے
لاہور(کھوج نیوز)ڈسٹرکٹ اینڈ سیشن کورٹ اسلام آباد نے تحریک انصاف کے رہنما رئوف حسن کا مزید 3 روز کا جسمانی ریمانڈ منظور کر لیا۔رئوف حسن و دیگر ملزمان کو 2 روزہ جسمانی ریمانڈ مکمل ہونے پر عدالت پیش کیا گیا۔ایف آئی اے کے تفتیشی افسرنے رئوف حسن سمیت دیگر ملزمان کے مزید جسمانی ریمانڈ کی استدعا کی۔ایف آئی اے پراسیکیوٹر نے عدالت کو بتایا کہ ملزمان کے سوشل میڈیا اکائونٹس ابھی تک ریکور نہیں ہوئے، ای میل اکائونٹ لاگ ان کرنے ہیں، پیسوں کے عوض لوگ واٹس ایپ گروپ چلا رہے ہیں، بیرون ملک سے لوگ بھی اس میں شامل ہیں۔
تفتیشی افسر کا کہنا تھا ملزمان کے موبائل سے سوشل میڈیا پر بنائے گئے جعلی اکانٹس ملے ہیں، رئوف حسن سوشل میڈیا ٹیم کی سربراہی کرتے ہیں، رئوف حسن کی جانب سے سوشل میڈیا ٹیم کو ہدایات دی جاتی ہیں۔ایف آئی اے کے پراسیکیوٹر نے کہا کہ عدلیہ اور انتظامیہ کے خلاف مہم چلائی جاتی ہے، ہمارے پاس سوشل میڈیا کا ایک ہی ٹیکنیکل ماہر ہے، سوشل میڈیا اکائونٹس جانچنے کے لیے مزید وقت درکار ہے۔
ڈسٹرکٹ اینڈ سیشن کورٹ اسلام آباد نے ایف آئی اے کے تفتیشی افسر کی درخواست منظور کرتے ہوئے رئوف حسن سمیت 9 شریک ملزمان کے جسمانی ریمانڈ میں مزید 3 روز کی توسیع کر دی۔خیال رہے کہ پولیس نے رئوف حسن کو 4 روز قبل پی ٹی آئی کے اسلام آباد سیکرٹریٹ سے حراست میں لیا تھا۔
