علی امین گنڈاپورکا مستقبل وزارت اعلیٰ سے اڈیالہ جیل،سنسنی خیز دعوی سامنے آگیا

لاہور (کھوج نیوز)پاکستان مسلم لیگ (ن) کے رہنما اورسینیٹرطلال چودھری نےکہا ہےکہ علی امین گنڈاپور کا مستقبل وزارت اعلی سے اڈیالہ جیل نظرآرہا ہے۔ اپنے ویڈیو بیان میں سینیٹرطلال چودھری نےکہاکہ جو پیسے کے پی کے عوام پر لگنے چاہئیں تھے وہ جلوسوں، اسلام آباد میں چڑھائی پرلگائےگئے، پی ٹی آئی جلسے میں بڑھکوں کےعلاوہ کچھ نہیں۔ طلال چودھری کا کہنا تھا گزشتہ چھ مہینےسےجس کا شورتھا وہ کل ختم ہوا، جلسہ کریں گے، پورا پاکستان نکلےگا، ہر شہر گلی سے لوگ نکلیں گے مگر کل اسلام آباد کا ایک گراونڈ بھی بھرا نہیں جا سکا۔ سینیٹر طلال چودھری نے کہا ہے کہ اس جلسے میں تقریریں کیا بہترین بڑھکیں تھیں، مجھے اپنے بچپن کی سلطان راہی کی فلمیں یاد آ گئیں جس میں بڑھکیں سن کر ہنسی ہی نکل سکتی ہے۔
وزیر اعلی خیبرپختونخوا کی تقریر سے متعلق مسلم لیگ (ن) کے رہنما طلال چودھری نے کہا کہ علی امین گنڈاپور کہتا ہے کہ 15 دن میں عمران خان کو رہا کرو ورنہ خود آ کر رہا کرا لوں گا، کیا پِدی، کیا پِدی کا شوربا، یہ تو ہو سکتا ہے کہ 15 دن بعد تم اڈیالہ جیل آو مگر یہ نہیں ہو سکتا ہے عمران خان اڈیالہ جیل سے پشاور جائے۔ علی امین گنڈا پور کے لاہور آنے کے بیان کو دھمکی اور گیدڑ بھبکی قرار دیتے ہوئے مسلم لیگ (ن) کے رہنما نے کہا ہے کہ ہنگامہ خیزی کے لئے آو گے تو تمہاری مونچھیں اکھاڑ دیں گے، جو بگڑے تگڑے ہیں ان کا علاج ڈنڈا ہے، یہ علاج قانون نافذ کرنے والے خوب کر لیتے ہیں، گولیاں غیرت مند کھاتے ہیں آپ ضرورتمند ہیں، دن میں بڑھکیں مارتے ہیں اور رات میں ہمارے پاوں پڑتے ہیں، بتائیں کہاں اور کیسے پڑتے ہیں؟
طلال چودھری نے کہا کہ اس جلسے میں کہا گیا کوئی قانون سازی ہوگی تو تحریک چلائیں گے، قانون سازی پارلیمان کا حق ہے، پاکستان میں دہشت گردی کے خلاف، معیشت کی بہتری، انتشار کے خاتمے اور سیاسی استحکام کی خاطر قانون سازی ہوگی، یہ گیدڑ بھبکیاں آج سے نہیں جب سے عمران خان کی سیاست میں پیدائش ہوئی ہے تب سے ہم سن رہے ہیں۔