حکومت مافیا نے گزشتہ روز قانون سازی کیسے کی؟ عمر ایوب نے بڑا الزام عائد کر دیا
عوام مہنگائی سے مر رہے،انہیں بل منظور کرانے کی پڑی ہے، فارم 47کی حکومت میں سکت نہیں، انہیں جیل میں بیٹھے شخص کا ڈر ہے، اپوزیشن لیڈرکا قومی اسمبلی میں خطاب
اسلام آباد (کھوج نیوز) قومی اسمبلی میں اپوزیشن لیڈر عمر ایوب نے حکومت کو مافیا قرار دیتے ہوئے کہاہے کہ گزشتہ روز ڈنڈے کے زور پر قانون سازی کی گئی، بھارت میں سپریم کورٹ ججز کی تعداد 33 یہاں 34ہوگئی، سروسز چیفس کی مدت ملازمت بڑھانے سے کتنے ہی افسران کا کیریئر ختم ہوگیا، عوام مہنگائی سے مر رہے،انہیں بل منظور کرانے کی پڑی ہے، فارم 47کی حکومت میں سکت نہیں، انہیں جیل میں بیٹھے شخص کا ڈر ہے۔
تفصیلات کے مطابق قومی اسمبلی کا اجلاس ڈپٹی سپیکر سید غلام مصطفی شاہ کی زیر صدارت منعقد ہوا۔ نکتہ اعتراض پر اظہار خیال کرتے ہوئے اپوزیشن لیڈر عمر ایوب نے کہا کہ کل ڈنڈا چلنے پر ایوان بھرا ہوا تھا،آج ڈنڈا ہٹا تو ایوان خالی پڑا ہے۔ انہوں نے کہا کہ گزشتہ روز ڈنڈے کے زور پر قانون سازی کی گئی، اپوزیشن کو بولنے تک نہیں دیا گیا، ان بلوں کو قائمہ کمیٹی میں زیر بحث لایا جاناچاہئے تھا۔ انہوں نے کہا کہ حکومت اپنے لئے خود گڑھا کھود رہی ہے، یہ قانون سازی ان کے خلاف استعمال ہوگی۔انہوں نے کہا کہ سروسز چیفس کی مدت ملازمت بڑھانے سے کتنے ہی افسران کا کیریئر ختم ہوگیا ہے،بھارت میں سپریم کورٹ کے ججز کی تعداد 33ہے یہاں 34ہوگئی۔انہوں نے کہا کہ عوام کو مہنگائی کی پڑی ہے مگر انہیں بلوں پر بل منظور کرانے کی پڑی ہے، یہ حکومت نہیں رجیم اور مافیا ہے، ان کو جیل میں بیٹھے شخص کا ڈر ہے۔ انہوں نے کہا کہ جب ہماری حکومت تھی تو جی ڈی پی 6فیصد تھا، آئیں کیمرہ لیکر مارکیٹ چلتے ہیں عوام سے مل کر پوچھ لیتے ہیں کہ کیا مہنگائی کم ہوئی ہے؟، آپ اپنے ساتھ کھڑے سیکیورٹی گارڈ سے پوچھ لیں مہنگائی کم ہوئی ہے؟،اس ایوان سے سردار اختر مینگل استعفا دے کر چلے گئے کسی کے کان پر جوں تک نہیں رینگی۔انہوں نے کہا کہ قومی ایئرلائن کا کیا حال کردیا، پی آئی اے کا ایک ہی بڈر آیا اور اس نے بھی صرف 10ارب روپے دینے کا کہا۔انہوں نے کہا کہ ملک ترقی نہیں کر رہا، 10لاکھ لوگ پاکستان چھوڑ کر چلے گئے، حکومت کو ہوش کے ناخن لینے چاہئیں۔عمر ایوب نے کہا کہ انہوں نے 9مئی،9مئی لگائی ہوئی ہے، یہ کل طلباء کو لے جا کر جناح ہاؤس دکھاتے رہے، ہم بھی خیبر پختونخوا کے طلباء و طالبات کو خیبرپختونخوا ہاؤس میں وفاقی فورسز کی گئی توڑ پھوڑ دکھائیں گے، ہم اپنے نوجوانوں کو دکھائیں گے کہ ایک صوبے پر کس طرح حملہ کیا گیا؟۔انہوں نے کہا کہ فی الفور صاف اور شفاف الیکشن ہونے چاہئیں، فارم 47کی حکومت میں سکت نہیں۔ انہوں نے بشری بی بی کو خراج تحسین پیش کرتے ہوئے کہا کہ سابق خاتون اول نے بھرپور طریقے سے کیسز کا سامنا کرکے ثابت کیا کہ وہ بانی پی ٹی آئی عمران خان کی طاقت ہیں۔
