علیمہ خان نے بانی پی ٹی آئی کا پیغام دو ٹوک الفاظ میں سامنے رکھ دیا

راولپنڈی (کھوج نیوز) سابق وزیراعظم عمران خان کی بہن علیمہ خان نے پاکستان تحریک انصاف کے بانی کا پیغام دو ٹوک الفاظ میں سامنے رکھ دیا ہے جس کے بعد ایک نئی بحث کا آغاز ہوگیا ہے۔

تفصیلات کے مطابق پاکستان تحریک انصاف کے بانی عمران خان کی بہن علیمہ خان نے کہا ہے کہ بانی پی ٹی آئی نے مذاکرات کیلئے اسٹیبلشمنٹ کا ہی کہا ہے۔ ان کا کہنا تھاکہ آج بانی پی ٹی آئی سے طویل ملاقات ہوئی ہے، بانی پی ٹی آئی نے علی امین گنڈا پور اور بیرسٹرگوہر کو مذاکرات کی اجازت دی ہے، انہوں نے دونوں رہنماؤں کواپنے مطالبات پرمذاکرات کی اجازت دی ہے۔علیمہ خان نے بتایاکہ بانی نے کہا ہے ہمارا احتجاج پرامن ہوگا، مینڈیٹ کی واپسی، کارکنوں، رہنماؤں کی رہائی اورجمہوریت کی بحالی کیلئے مذاکرات کاکہاگیا اور جمعرات تک کا وقت دیا ہے۔ ان کا کہنا تھاکہ بانی پی ٹی آئی نے کہا ہے دونوں رہنماؤں نے مذاکرات کی اجازت مانگی ہے، 24 نومبر پاکستان کیلئے اہم دن ہے، 8فروری کی طرح 24 نومبر کو بھی نکلیں۔انہوں نے کہا کہ چوری شدہ مینڈیٹ واپس ہوتاہے تو 24 نومبرکا احتجاج جشن میں تبدیل ہوجائیگا۔علیمہ خان نے کہا کہ بانی پی ٹی آئی نے مذاکرات کیلئے اسٹیبلشمنٹ کا ہی کہا ہے، حکومت تو خود کہتی ہے اس کے ہاتھ میں کچھ نہیں ہے، حکومت والے توٹی وی پرکہہ رہے ہیں ہمارے ہاتھ میں کچھ نہیں ہے۔انہوں نے کہا کہ جب جماعتوں نے کہہ دیا ہمارے ہاتھ میں کچھ نہیں پھرانہیں سے مذاکرات کریں گے جن کے ہاتھ میں ہے، بانی پی ٹی آئی نے یہی کہا ہے پریکٹیکل چیز ہے اور حالات بھی اس وقت یہی ہیں۔