عمران خان کا کونسے مقدمے میں 5روزہ جسمانی ریمانڈ منظور ہوا؟ تفصیل آگئی

راولپنڈی (کھوج نیوز) پاکستان تحریک انصاف کے بانی عمران خان کا کونسے مقدمے میں 5روزہ جسمانی ریمانڈ منظور ہوا؟ اس حوالے سے تمام تر تفصیلات منظر عام پر آگئی ہیں۔

تفصیلات کے مطابق انسداد دہشتگردی عدالت کے جج نے اڈیالہ جیل میں بانی پی ٹی آئی کے خلاف 28 ستمبر کو راولپنڈی میں احتجاج پر اکسانے کے کیس کی سماعت کی جس دوران عمران خان کے وکیل بیرسٹر سلمان صفدر اور حکومتی پراسیکیوٹر نے دلائل دیئے ۔ سماعت کے دوران اسپیشل پبلک پراسیکیوٹر ظہیر شاہ نے بانی پی ٹی آئی کے 15دن کے جسمانی ریمانڈ کی استدعا کرتے ہوئے کہا کہ عمران خان کی کال پر دفعہ144 کے نفاذ کے باوجود مظاہرین نے سرکاری املاک پر حملے کیے، انہوں نے 28 ستمبر کے احتجاج کی منصوبہ بندی اڈیالہ جیل میں کی اور وہیں سے کال دی تھی۔

بعد ازاں عدالت نے پراسیکیوٹر کی جانب سے15 دن کے ریمانڈ کی استدعا مسترد کرتے ہوئے عمران خان کا5 روزہ جسمانی ریمانڈ منظور کیا۔ انسداد دہشتگردی عدالت نے بانی پی ٹی آئی کو26 نومبر کو دوبارہ پیش کرنے کا حکم دیا اور ہدایت کی کہ عمران خان سے جیل کے اندر ہی تفتیش کی جائے۔ عمران خان کے وکیل سلمان صفدر نے کہا کہ بانی پی ٹی آئی ڈیڑھ سال سے اڈیالہ جیل میں قید تنہائی میں ہیں، وہ جیل میں رہ کر کیسے اتنی بڑی منصوبہ بندی کرسکتے ہیں؟ یہ مقدمہ سیاسی انتقامی کارروائی ہے اور درج متن مفروضوں پر مبنی ہے۔