بشریٰ بی بی کے دعویٰ میں کتنی سچائی؟ جنرل (ر) قمر جاوید باجوہ کا ردعمل، نیا کٹا کھل گیا

اسلام آباد (کھوج نیوز) بانی پی ٹی آئی عمران خان کی اہلیہ بشریٰ بی بی کے دعویٰ میں کتنی سچائی؟ جنرل (ر) قمر جاوید باجوہ کا ردعمل سامنے آنے کے بعد ملک بھر میں ایک نیا کٹا کھل گیا ہے۔

تفصیلات کے مطابق سابق آرمی چیف جنرل (ر ) قمر جاوید باجوہ کا کہنا تھا کہ سعودی عرب پاکستان کا دوست اور محسن ہے ، سعودی عرب نے ہر دور میں پاکستان کی بھر پور مدد کی، سعودی عرب نے بانی پی ٹی آئی کی حکومت کا بھی بہت خیال رکھا اور مدد کی۔ قمر جاوید باجوہ نے کہا کہ بشریٰ بی بی کا غیر ذمہ دارانہ بیان سراسر بے بنیاد ہے، سیاسی مفادات کے لیے بے بنیاد الزامات لگا کر قومی مفادات کو نقصان نہیں پہنچانا چاہیے، ذاتی طور پر جانتا ہوں کہ سعودی عرب نے ہر مشکل وقت میں پاکستان کا ساتھ دیا۔

واضح رہے کہ گزشتہ روز بشری بی بی نے اپنے ویڈیو بیان میں دعوی کیا کہ عمران خان جب مدینہ ننگے پاؤں گئے اور واپس آئے توباجوہ (سابق آرمی چیف قمر جاوید باجوہ) کو کالز آنا شروع ہوگئیں، باجوہ کو کہا گیا کہ یہ آپ کس شخص کو لے کر آئے ہیں، ہمیں ایسے لوگ نہیں چاہئیں۔ بشری بی بی کے مطابق باجوہ کو کہا گیا ہم تو ملک میں شریعت ختم کرنے لگے ہیں اور آپ ایسے شخص کو لیکر آئے،کہا گیا ہمیں ایسے لوگ نہیں چاہئیں تب سے ہمارے خلاف گند ڈالنا شروع کردیا گیا، میرے خلاف گند ڈالا گیا ، بانی پی ٹی آئی کو یہودی ایجنٹ کہنا شروع کیا گیا تاہم جنرل ریٹائرڈ قمر جاوید باجوہ نے بشری بی بی کے الزام کی تردید کی ہے۔