وزیراعلیٰ پنجاب مریم نواز ”سپر سی ایم” کا خطاب ، تمام ریکارڈ توڑ ڈالے

لاہور(کھوج نیوز) وزیراعلیٰ پنجاب مریم نواز شریف نیشنل سکیورٹی ورک شاپ کے شرکاء نے ”سپر سی ایم” کا خطاب دے دیا کیونکہ انہوں نے اپنی کارکردگی سے تمام ریکارڈ توڑ ڈالے ہیں۔

تفصیلات کے مطابق وزیراعلیٰ پنجاب مریم نواز سے نیشنل سکیورٹی ورک شاپ کے شرکا نے ملاقات کی جس دوران شرکاء نے وزیراعلیٰ کو سپر سی ایم کا خطاب دیا اور کہاکہ پنجاب میں آکر لگا اندھیرے سے روشنی میں آگئے ہیں۔ وزیراعلیٰ پنجاب مریم نواز کا اس موقع پر کہنا تھا کہ پنجاب میں مجموعی حالات باقی صوبوں سے بہتر ہیں، یہاں کوئی بھی تعیناتی سفارش پر نہیں ہوئی، میرٹ کے معاملے پر کسی کی نہیں سنتی، اسموگ جلد کنٹرول کرنا چاہتے ہیں، حکومتی اقدامات کے مثبت اثرات بھی سامنے آرہے ہیں۔

وزیراعلی پنجاب کا کہنا تھا کہ دہشتگردی کے خطرات رہتے ہیں، امن و امان اولین ترجیح ہے، پنجاب میں سیف سٹی بنائیں گے، ہر جگہ پینک بٹن لگائیں گے، کرپشن میری ریڈ لائن ہے، 15 کروڑ عوام کی زندگی پر مثبت اثرات مرتب کرنے والا ہر کام میری ترجیح ہے۔ مریم نواز نے مزید کہا کہ حکومتوں کو کام نہیں کرنے دیا جاتا، ہم چور ڈاکو پکڑتے ہیں اور وہ عدالتوں سے چھوٹ کر آجاتے ہیں۔ انہوں نے کہا کہ پاکستان میں مہنگائی کم اور زرمبادلہ کے ذخائر بڑھ رہے ہیں،اسٹاک مارکیٹ نے ریکارڈ توڑ دیے، آئی ٹی ایکسپورٹ بڑھ رہی ہیں، مہنگائی کنٹرول کرنا مشکل کام ہے تاہم 38 فیصد سے 7 فیصد پر آنا بہت بڑا کام ہے۔