بانی پی ٹی آئی اور ان کی اہلیہ بشریٰ بی بی کو بھی چارج شیٹ کردیا گیا

راولپنڈی(کھوج نیوز)بانی پی ٹی آئی اوران کی اہلیہ بشریٰ بی بی کو بھی چارج شیٹ کردیا گیا،رپورٹ کے مطابق توشہ خانہ کیس  2 میں عمران خان اور بشریٰ بی بی پر فرد جرم عائد کردی گئی ہے جبکہ بانی پی ٹی آئی اور ان کی اہلیہ نے صحت جرم سے انکار کیا ہے۔ اسپیشل کورٹ سینٹرل ون اسلام آباد نے عمران خان اور بشریٰ بی بی پر فرد جرم عائد کی، توشہ خانہ ٹو کیس کی ابتدائی تحقیقات نیب کی کی تھی، نیب ترامیم کی روشنی میں یہ کیس ایف آئی اے کو منتقل کیا گیا تھا۔

یاد رہے کہ 12 ستمبر 2024 کو توشہ خانہ ٹو کیس کی تحقیقات کے لیے ایف آئی اےکی 3 رکنی جوائنٹ انویسٹی گیشن ٹیم (جے آئی ٹی) تشکیل دے دی گئی تھی۔ نیب ترامیم کے حوالے سے سپریم کورٹ کے فیصلے کے بعد احتساب عدالت نے بانی پاکستان تحریک انصاف (پی ٹی آئی) عمران خان اور بشریٰ بی بی کے خلاف توشہ خانہ ٹو ریفرنس نیب سے ایف آئی اے کو منتقل کردیا تھا۔

قبل ازیں، عدالت نے توشہ خانہ 2 ریفرنس کا ریکارڈ اسپیشل جج سینٹرل کی عدالت کو منتقل کرنے کا حکم دیا تھا۔ جبکہ 13 جولائی کو نیب نے عمران خان اور ان کی اہلیہ کو عدت نکاح کیس میں ضمانت ملنے کے فوری بعد توشہ خانہ کے ایک نئے ریفرنس میں گرفتار کرلیا تھا۔ نیب کی انکوائری رپورٹ کے مطابق نیا کیس 7 گھڑیوں سمیت 10 قیمتی تحائف خلاف قانون پاس رکھنے اور بیچنے سے متعلق ہے۔