وزیر اعظم کی سخت ہدایات ،انسانی اسمگلروں کے خلاف گھیرا تنگ

اسلام آباد( کھوج نیوز)وزیراعظم پاکستان شہباز شریف نے انسانی اسمگلنگ کی روک تھام کے لیے متعلقہ اداروں کو آپس میں رابطے مزید بہتر بنانے کی ہدایت کی ہے۔انہوں نے کہاکہ انسانی اسمگلنگ پاکستان کے لیے دنیا بھر میں بدنامی کا باعث بنتی ہے، 2023 کے کشتی الٹنے کے حادثے کے بعد ذمہ داروں کے خلاف کارروائی میں انتہائی سست روی سے کام لیا گیا، ذمہ دار افسروں کے خلاف سخت کارروائی ہوگی۔

اجلاس میں حکام کی جانب سے بریفنگ دیتے ہوئے بتایا گیا کہ یونان کشتی حادثے میں جاں بحق ہونے والے 5 پاکستانیوں کی شناخت کرلی گئی، جبکہ دیگر کہ شناخت کا عمل جاری ہے۔بریفنگ کے مطابق ایتھنز میں موجود پاکستانی سفارت خانہ کشتی حادثے کے حوالے سے یونانی حکام سے مسلسل رابطے میں ہے۔ کشتی حادثے کے حوالے سے معلومات اور مدد کے لیے ایتھنز میں موجود پاکستانی سفارت خانے سے ہیلپ لائین helpline +30-6943850188 اور وزارت خارجہ کے کرائسز مینجمینٹ یونٹ کے نمبر 0519207887 پر رابطہ کیا جا سکتا ہے۔

حکام نے بتایا کہ گوجرانوالا، گجرات، سیالکوٹ اور منڈی بہا الدین کے اضلاع سے سب سے زیادہ افراد انسانی اسمگلروں کا شکار ہوتے ہیں، انسانی اسمگلنگ کی روک تھام کے حوالے سے قانون سازی مزید بہتر بنائی جا رہی ہے۔