وزیر اعلی پنجاب کی زیرصدرات خصوصی اجلاس ،ترقیاتی منصوبوں کو جلد مکمل کرنے کی ہدایت

لاہور (کھوج نیوز)وزیر اعلی پنجاب مریم نواز کی زیر صدارت خصوصی اجلاس ہوا، پنجا ب بھر میں جاری روڈز اور ہیلتھ کے ڈویلپمنٹ پراجیکٹس کاجائزہ لیا گیا۔ وزیراعلی پنجاب نو تعمیر شدہ بنیادی مراکز صحت اور دیہی مراکز صحت کا خود معائنہ اور افتتاح کریں گی، وزیراعلی مریم نوازشریف نے پی اینڈ ڈی کو اضافی وسائل پیدا کرنے کا ہدف بھی دیا گیا ہے ۔

وزیر اعلی پنجاب کو صوبائی سیکرٹری تعمیرات و مواصلات سہیل اشر ف نے ترقیاتی منصوبوں کے بارے میں تفصیلی بریفنگ دی جس میں بتایا گیا کہ روڈ بحالی پروگرام کے تحت 462 پروجیکٹس کی منظوری ہوئی، 455 پر کام شروع ہوا، روڈ بحالی پروگرام کے تحت تعمیر و بحالی کا 25فیصد سے زائد کام مکمل کرلیا گیا۔ روڈ بحالی پروگرام فیز ٹوکے تحت 72سکیموں کی منظوری،67 پر کام شروع ہوا، روڈ بحالی پروگرام فیز ٹو کے پراجیکٹ پر 24فیصد سے زائد کام مکمل کرلیا گیا۔

اجلاس میں پنجا ب بھر کے 1236 بنیادی مراکز صحت کی تعمیر وبحالی کے بارے میں تفصیلی بریفنگ دی گئی جس کے مطابق پنجاب بھر میں مراکز صحت کی تعمیر و بحالی کا 75فیصد کام مکمل کرلیا گیا، پنجاب کے مختلف علاقوں میں 54 بنیادی مراکز صحت کی تعمیر و بحالی پوری طرح مکمل ہوگیا جب کہ 1164 بنیادی مراکز صحت پر تعمیر و بحالی تکمیل کی جانب گامزن ہیں۔

اس موقع پر وزیراعلی مریم نواز نے مراکز صحت کی تعمیر و بحالی کی بروقت تکمیل کی ہدایت کی اور کہا کہ پنجاب بھر میں رابطہ سڑکو ں کی بحالی اور تعمیر و مرمت سے لاکھوں شہری مستفید ہو ں گے، کھیت تا منڈی سڑک کی تعمیر سے معاشی سرگرمیاں بھی بڑھیں گی۔ان کا کہنا تھا کہ نئے مریم نواز ہیلتھ کلینک بننے سے دور دراز علاقوں کے عوام کو صحت کی بہترین سہولتیں میسر ہوں گی، پہلی مرتبہ دیہات کے عوام کو شہروں کے اعلی پرائیویٹ کلینکس کا ماحول ملے گا۔