وزیر اعظم شہباز شریف کی زیر صدرات ریلویز کا اہم اجلاس

اسلام آباد (کھوج نیوز )وزیر اعظم محمد شہباز شریف کی زیر صدرات پاکستان ریلویز کااہم اجلاس ہوا ۔اس اجلاس میں وزیراعظم کو پاکستان ریلویز کی بحالی اور ترقی کے حوالے سے لیے گئے اقدامات پر بریفنگ دی گئی ۔وزیر اعظم کو بر یفنگ میں بتا یا گیا کہ سال 2022 کے تباہ کن سیلاب میں پاکستان ریلویز کو 10 ارب روپے کا نقصان ہوا اور 35 دنوں تک پٹریاں زیر آب رہیں۔وزیر اعظم کو بتا یا گیا کہ پاکستان ریلویز نے 2022 کے سیلابوں کے بعد مختلف اقدامات سے اپنی کارکردگی بہتر کی اور مال برداری (Freight Operations) میں اب تک ابتدائی لاگت کے برابر منافع کمایا جا چکا ہے۔بریفنگ میں یہ بھی بتا یا گیا کہ ملک میں مال برداری کی مارکیٹ میں پاکستان ریلویز کا 8 فیصد حصہ ہے، اورپاکستان ریلویز کی رائٹ سائزنگ کے عمل میں 18 فیصد غیر ضروری عملہ فارغ کر دیا گیا ہے ۔پاکستان ریلویز کے تھر کول کے مواصلاتی منصوبے پر کام تیزی سے جاری ہے۔

اس موقع پر وزیر اعظم شہباز شریف نے متعلقہ حکام کو پاکستان ریلویز میں مال برادری کے ساتھ سفر کی خدمات کو بھی منافع بخش بنانے کی ہدایت کی ان کا کہنا تھا کہ پاکستان ریلویز کی زمین نجی شعبے کے تعاون سے کاروباری سرگرمیوں کے لیے استعمال کی جائے۔ پاکستان ریلویز خطے میں خصوصا وسطی ایشیائی ممالک کے ساتھ تجارت بڑھانے کے لیے حکمت عملی تشکیل دے۔ان کا حکام کو مزید کہنا تھا کہ پاکستان ریلویز کو مسابقتی طور پر مسافروں کو راغب کرنے کی ضرورت ہے۔ وزیراعظم نے پاکستان ریلویز میں پیشہ ورانہ اور با صلاحیت افرادی قوت استعمال کرنے کی ہدایت بھی کی ہے ۔