وزیراعظم شہباز شریف کا دورہ یو اے ای، بین الاقوامی تعاون کے مستقبل پر تبادلہ خیال

اسلام آباد(کھوج نیوز) وزیر اعظم شہباز شریف دو روزہ سرکاری دورے پر متحدہ عرب امارات (یو اے ای) روانہ ہوگئے جبکہ وہاں پر بین الاقوامی تعاون کے مستقبل پر تبادلہ خیال کیا جائے گا۔

تفصیلات کے مطابق وزیر اعظم شہباز شریف کا وزارت عظمیٰ سنبھالنے کے بعد یو اے ای کا یہ دوسرا دورہ ہے۔ شہباز شریف متحدہ عرب امارات کے نائب صدر اور وزیراعظم شیخ محمد بن راشد المکتوم کی دعوت پر ورلڈ گورنمنٹس سمٹ میں شرکت کے لیے یہ دورہ کر رہے ہیں۔ ترجمان وزارت خارجہ کی جانب سے اتوار کو جاری بیان میں کہا گیا تھا کہ شیخ محمد بن راشد المکتوم کی سربراہی میں منعقدہ اجلاس میں گورننس، اختراعات اور بین الاقوامی تعاون کے مستقبل پر تبادلہ خیال کیا جائے گا۔ اس کے لیے مختلف ریاستوں کے سربراہان، عالمی پالیسی سازوں اور نجی شعبے کے سرکردہ رہنماؤں کو مدعو کیا گیا ہے۔ وزیر اعظم کے ہمراہ نائب وزیر اعظم و وزیر خارجہ سینیٹر اسحق ڈار، کابینہ کے اہم ارکان اور ایک اعلی سطح کا وفد بھی روانہ ہوا۔ اپنے دورے کے دوران شہباز شریف، ڈبلیو جی ایس سے اپنے خطاب میں جامع اقتصادی ترقی، ڈیجیٹل تبدیلی اور گورننس اصلاحات کے لیے پاکستان کے وژن کو اجاگر کریں گے۔ اس دوران شہباز شریف، متحدہ عرب امارات کی قیادت کے ساتھ دوطرفہ ملاقاتیں بھی کریں گے جب کہ دیگر سربراہان مملکت اور ملٹی نیشنل کمپنیوں کے سرکردہ چیف ایگزیکٹو افسران سے بھی ملاقات کریں گے۔