آرمی چیف نے خوارج اور سہولت کاروں کیلئے خطرے کی گھنٹی بجا دی

بنوں (کھوج نیوز) آرمی چیف جنرل عاصم منیر نے آج بنوں کا دورہ کیا جس کے دوران انہوں نے خطاب کرتے ہوئے خوارج اور سہولت کاروں کے لئے خطرے کی گھنٹی بجا دی ہے۔

تفصیلات کے مطابق آئی ایس پی آر کا کہنا ہے کہ آرمی چیف نے 4 مارچ کوبنوں کینٹ پر خوارج کے ناکام دہشتگرد حملے کے تناظر میں بنوں کادورہ کیا، آرمی چیف کی آمد پر کور کمانڈر پشاور نے ان کا استقبال کیا۔ آرمی چیف نے سی ایم ایچ بنوں کا بھی دورہ کیا جہاں انہوں نے زخمی جوانوں کی خیریت دریافت کی اور ان کی ہمت اور غیر متزلزل عزم کو سراہا۔ آئی ایس پی آر کے مطابق آرمی چیف نے حملے میں شہید ہونے والے معصوم شہریوں کے اہلخانہ سے گہرے افسوس اور تعزیت کا اظہاربھی کیا۔

اس موقع پر آرمی چیف کا کہنا تھا کہ پاکستان آرمی ریاست کی سلامتی اور استحکام یقینی بنانے کے لیے دہشتگردی کے خلاف ڈھال بنی رہے گی۔ آرمی چیف جنرل سید عاصم منیر نے کہا کہ اس حملے کے مرتکب دہشتگردوں کو بہادر جوانوں نے فوری طورپرانجام تک پہنچا دیا، اس گھناؤنے حملے کے منصوبہ سازوں اورسہولت کاروں کو جلد انصاف کے کٹہرے میں لایا جائیگا، چاہے وہ کہیں بھی ہوں۔

آرمی چیف نے کہا کہ خوارج اور ان کے سہولتکاروں کے خلاف جنگ اپنے منطقی انجام تک جاری رہے گی، خوارج دشمن عناصر کے اشارے پر کام کر رہے ہیں، دہشتگرد گروہ بشمول فتنہ الخوارج افغان سرزمین سے پاکستان کیخلاف کارروائیاں کر رہے ہیں۔ آرمی چیف جنرل سید عاصم منیر نے مزید کہا کہ حالیہ دہشتگرد حملوں میں غیرملکی ہتھیاروں اور سازوسامان کا استعمال کیا گیا، پاکستان کا امن و استحکام خراب کرنے کی کسی کوبھی اجازت نہیں دی جائیگی۔ آرمی چیف کا مزید کہنا تھا کہ خواتین، بچوں، بزرگوں اور معصوم شہریوں کو نشانہ بنانا اسلام دشمن خوارج کے اصل عزائم کوبے نقاب کرتا ہے، دہشت گردی کیخلاف جنگ میں مقامی کیمونٹی کا کردار انتہائی اہم ہے، اس موقع پر آرمی چیف نے قومی یکجہتی کی اہمیت پر بھی زور دیا۔