بلوچستان ایک مرتبہ پھر دہشت گردی کی زد میں ،سات افراد جاں بحق متعدد زخمی

کوئٹہ(کھوج نیوز)پولیس کے مطابق نوشکی دالبندین شاہراہ پربس کے قریب دھماکا ہوا جس میں 5 افراد جاں بحق اور 35 افراد زخمی ہوئے جنہیں طبی امداد کیلئے نوشکی اسپتال منتقل کر دیا گیا۔پولیس کا بتانا ہے کہ نوشکی دھماکے کے 2 زخمی دوران علاج دم توڑ گئے جس کے بعد جاں بحق افراد کی تعداد 7 ہو گئی جبکہ زخمیوں میں متعدد افراد کی حالت تشویشناک ہے۔

دوسری جانب ایم ایس میر گل خان نصیر ٹیچنگ اسپتال نوشکی کا کہنا ہے کہ اسپتال میں ایمرجنسی نافذ کر دی گئی ہے۔

وزیراعلی بلوچستان سرفراز بگٹی نے نوشکی دالبندین شاہراہ پربس کے قریب دھماکے کی مذمت کرتے ہوئے قیمتی جانوں کے ضیاع پرگہرے دکھ اور افسوس کا اظہار کیا۔سرفراز بگٹی نے کہا کہ صوبے کے امن سے کھیلنے والوں کو عبرتناک انجام تک پہنچائیں گے، بزدلانہ حملے ہمارے حوصلے پست نہیں کر سکتے، دہشتگردوں کوکہیں پناہ نہیں ملیگی، بلوچستان میں ہر قیمت پر امن قائم کریں گے۔

انھوں نے مزید کہا کہ دشمن عناصر سن لیں ریاست ان کے ناپاک عزائم خاک میں ملا دے گی، یہ جنگ آخری دہشتگرد کے خاتمے تک جاری رہے گی، امن دشمنوں کوکیفر کردار تک پہنچانے کے لیے ہر ممکن اقدم کریں گے۔