بھارت میں ایٹمی تنصیبات اور مواد کی سکیورٹی کا معاملہ، پاکستان نے بڑا مطالبہ کر دیا

اسلام آباد(کھوج نیوز) بھارت میں ایٹمی تنصیبات اور مواد کی سکیورٹی کے معاملے پر پاکستان نے بڑا مطالبہ کر دیا ہے جس کے بعد مودی سرکار سمیت پورے بھارت میں ایک نئی بحث چھیڑ گئی ہے۔

تفصیلات کے مطابق ترجمان دفتر خارجہ نے بھارتی وزیر دفاع کے پاکستانی ایٹمی اثاثوں سے متعلق بیان کی شدید مذمت کی اور کہا یہ غیر ذمہ دارانہ بیان بھارتی عدم تحفظ اور ناکام دفاعی حکمت عملی کی عکاسی کرتا ہے، پاکستان کی روایتی دفاعی صلاحیت بھارت کی جارحیت کو روکنے کے لیے کافی ہے۔ ترجمان نے کہا کہ بھارت کے شہر دہرہ دون میں 5 افراد کے قبضے سے ایٹمی مواد برآمد ہوا اور گزشتہ برس بھارت میں 100 ملین ڈالر مالیت کا تابکاری مواد کالیفورنیم برآمد ہوا جب کہ 2021ء میں بھی بھارت میں تابکار مواد کی چوری کے تین واقعات رپورٹ ہوئے، تابکار مواد کی چوری کے واقعات بھارت میں ایٹمی مواد کے کالے بازار کی نشاندہی کرتے ہیں۔