فیلڈ مارشل عاصم منیر کی جانب سے عشائیہ’ صدر مملکت اور وزیراعظم سمیت کس کس نے شرکت کی؟
عشائیے میں صدر مملکت، وزیراعظم، نائب وزیراعظم، بلاول ، وفاقی وزرائ، صوبائی گورنرز، چیئرمین جوائنٹ چیفس آف سٹاف کمیٹی، سروسز چیفس اور دیگر عسکری حکام کی شرکت
راولپنڈی (کھوج نیوز) آرمی چیف فیلڈ مارشل عاصم منیر کی جانب سے عشائیہ دیا گیا ، اس تقریب میں صدر مملکت اور وزیراعظم سمیت کس کس نے شرکت کی؟ تفصیلات سامنے آگئیں۔
تفصیلات کے مطابق آئی ایس پی آر کی جانب سے بتایا گیا ہے کہ عشائیے میں صدر مملکت آصف زرداری، وزیراعظم شہباز شریف، نائب وزیراعظم اسحاق ڈار، چیئرمین پاکستان پیپلز پارٹی بلاول بھٹو زرداری، وفاقی وزرا، صوبائی گورنرز، وزرائے اعلی، چیئرمین جوائنٹ چیفس آف اسٹاف کمیٹی، سروسز چیفس اور دیگر عسکری حکام نے شرکت کی۔
آئی ایس پی آر کے مطابق فیلڈ مارشل عاصم منیر نے معرکہ حق کے دوران سیاسی قیادت کی دوراندیشی اور اسٹریٹیجک بصیرت پر اظہار تشکر کیا اور آپریشن بنیان مرصوص کی کامیابی میں تینوں افواج کے درمیان ہم آہنگی کو سراہا۔ آرمی چیف نے بھارتی پروپیگنڈا مہم کے خلاف پاکستانی نوجوانوں اور میڈیا کے ناقابل تسخیر کردار کو آہنی دیوار قرار دیا۔ شرکاء نے اس فیصلہ کن دور میں قوم کی رہنمائی کرنے والی مدبرانہ قیادت کو خراجِ تحسین پیش کیا اور افواجِ پاکستان کی جرات و قربانی اور پاکستانی عوام کی پختہ حب الوطنی کو سراہا۔
