عمران خان کیساتھ ساتھ شہباز شریف کی بھی عدالت میں پیشی
پانامہ کیس میرے خلاف نہیں تھا' فیصلے کا علم نہیں، پانامہ کیس میں فریق کون تھے؟ شہباز شریف نے جواب دیا کہ وہ فریق نہیں تھے مگر یہ سب ریکارڈ کا حصہ ہے
لاہور(کھوج نیوز) پاکستان تحریک انصاف کے بانی عمران خان کے خلاف 10ارب ہرجانے کے کیس میں وزیراعظم میاں شہباز شریف بھی ویڈیو لنک کے ذریعے عدالت میں پیش ہوئے ۔
تفصیلات کے مطابق کیس کی سماعت کے آغاز پر وزیر اعظم شہباز شریف نے کہا کہ جج صاحب آپ سمیت کمرہ عدالت میں موجود تمام افراد کو فتح مبارک ہو، اس پر وکیل بانی پی ٹی آئی نے کہا یہ بہت خوشی کی بات ہے، ساری قوم کی فتح ہے۔ وکیل نے جب شہباز شریف سے یہ پوچھا کہ پانامہ کیس کا فیصلہ کیا ہوا تھا؟ تو شہباز شریف نے جواب دیا کہ پانامہ کیس ان کے خلاف نہیں تھا اس لیے فیصلے کا علم نہیں ، وکیل نے پوچھا کہ پانامہ کیس میں فریق کون تھے؟ شہباز شریف نے جواب دیا کہ وہ فریق نہیں تھے مگر یہ سب ریکارڈ کا حصہ ہے۔
دوران سماعت بانی پی ٹی آئی کے وکیل نے جرح کرتے ہوئے شہباز شریف سے سوال کیا کہ کیا یہ درست ہے کہ آپ نے دعوے میں اخبارات کو فریق نہیں بنایا اور نہ ہی لیگل نوٹس دیا ، کیا اس کی وجہ یہ ہے کہ بانی پی ٹی آئی نے خود اخبارات کو بیان جاری نہیں کیا تھا؟ اس پر شہباز شریف نے کہا کہ 28 اپریل 2017ء کو بانی پی ٹی آئی نے پریڈ گراؤنڈ میں جلسہ کیا اور اگلے دن اخبارات میں اس کی خبر شائع ہوئی۔ بعد ازاں کیس کی مزید سماعت 2 جون تک ملتوی کردی گئی۔
