توڑ پھوڑ کا الزام، ارکان اسمبلی پر بھاری جرمانہ عائد

لاہور (کھوج نیوز) پنجاب اسمبلی میں توڑ پھوڑ کے الزام میں 10ارکان اسمبلی پر بھاری جرمانہ عائد کر دیا گیا ہے ، یہ جرمانہ کتنا ہے؟ اس حوالے سے تمام تر اعدادو شمار منظر عام پر آگئے ہیں۔

تفصیلات کے مطابق پنجاب اسمبلی کی جانب سے جاری کیے گئے نوٹیفکیشن میں بتایا گیا ہے کہ اسمبلی اجلاس میں مائیک توڑنے والے 10 ارکان پر 20 لاکھ سے زائد کا جرمانہ عائد کیا گیا ہے۔ جرمانے کی زد میں آنے والے ارکان میں جاوید کوثر، اسد عباس، محمد تنویر اسلم، سید رفعت محمود، محمد اسماعیل، شہباز احمد، امتیاز محمود، خالد زبیر، رانا اورنگزیب اور محمد احسن شامل ہیں۔ نوٹیفکیشن میں بتایا گیا ہے کہ سرکاری املاک کو نقصان پہنچانے پر 2 لاکھ 3550 روپے فی کس جرمانہ عائد کیا گیا ہے۔ نوٹیفکیشن کے مطابق 16 جون کے اجلاس میں ویڈیو شواہد کی بنیاد پر فیصلہ کیا گیا اور7 روز میں جرمانہ ادا نہ کرنے والے ارکان کیخلاف کارروائی ہوگی۔