سوات سانحہ، سیاحوں کی جان بچانے والے مقامی نوجوانوں کیلئے بڑا انعام کا اعلان

خیبرپختونخوا (کھوج نیوز) سوات سانحہ میں سیاحوں کی جان بچانے والے مقامی نوجوان کے لئے گورنر خیبرپختونخوا فیصل کریم کنڈی نے بڑے انعام کا اعلان کر دیا ہے ۔

تفصیلا تکے مطابق گورنر خیبرپختونخوا فیصل کریم کنڈی نے سوات واقعے میں سیاحوں کی جان بچانے والے مقامی نوجوانوں سے ملاقات کی اور مصنوعی کشتی کے ذریعے سیاحوں کی جان بچانے پر انہیں خراج تحسین پیش کیا۔ انہوں نے دونوں نوجوانوں کی بہادری اور انسانی امداد کے جذبے کو سراہا۔

گورنر نے محمد ہلال خان اور عصمت علی کو سول ایوارڈ دینے کیلئے وزیراعظم کو سفارش بجھوانے کا بھی اعلان کیا۔ انہوں نے کہا کہ مقامی بہادر نوجوانوں نے اپنی جان پر کھیل کر مصنوعی کشتی کے ذریعے سیاحوں کو ریسکیو کیا، مقامی نوجوانوں کی یہ بہادری اور انسانی امداد کا جذبہ قابل تعریف ہے۔ گورنر خیبر پختونخوا نے چیئرمین ہلال احمر کو سوات میں ایمرجنسی خدمات کی فراہمی کیلئے مزید مستحکم کرنیکی ہدایت بھی کی۔ گورنر نے دونوں نوجوانوں کو اپنی جانب سے عمرہ پر بھیجنے کا اعلان بھی کیا اور نوجوانوں کو ان کی بہادری اور انسانی خدمت کے جذبے پر تعارفی شیلڈ بھی پیش کی۔