طلال چوہدری اور نبیل گبول میں تلخ کلامی کیوں ہوئی؟
حکومت کو خیرات میں جو دو تہائی اکثریت ملی ہے اس سے طلال چوہدری مغرور ہوگئے ہیں، پیپلز پارٹی نے پہلے بھی ان کو حکومت گرا کر دکھائی تھی، اب بھی یہ کام کرسکتے ہیں
اسلام آباد(کھوج نیوز) قومی اسمبلی کی قائمہ کمیٹی داخلہ کے اجلاس میں مسلم لیگ ن کے طلال چوہدری اور پیپلز پارٹی کے نبیل گبول میں تلخ کلامی کیوں ہوئی؟ تمام تر وجوہات سامنے آگئی ہیں۔
تفصیلات کے مطابق قائمہ کمیٹی داخلہ کے اجلاس کے دوران شازیہ مری سی ڈی اے ترمیمی بل پیش کرنے میں مبینہ رکاوٹ پر برہم ہوگئیں اور چیئرمین سی ڈی اے کے خلاف تحریک استحقاق لانے کا اعلان کیا۔ اس پر وزیر مملکت داخلہ طلال چوہدری نے چیئرمین سی ڈی اے کا دفاع کرتے ہوئے کہا کہ شازیہ مری تحریک استحقاق لائیں وہ اس کا سامنا کریں گے۔
شازیہ مری نے جوابا کہا کہ طلال چوہدری دھمکی دے رہے ہیں، اس پر وزیر مملکت نے کہاکہ دھمکی شازیہ مری دے رہی ہیں۔ بعد ازاں پی پی رہنما نبیل گبول وزیر مملکت کے رویے پر احتجاجا اجلاس سے واک آؤٹ کرگئے۔ نبیل گبول نے کہا کہ حکومت کو خیرات میں جو دو تہائی اکثریت ملی ہے اس سے طلال چوہدری مغرور ہوگئے ہیں، پیپلز پارٹی نے پہلے بھی ان کو حکومت گرا کر دکھائی تھی، اب بھی یہ کام کرسکتے ہیں۔
