برطانیہ کیلئے پاکستانی پروازوں کی بحالی، وزیراعظم کا خیر مقدم

اسلام آباد(کھوج نیوز) برطانوی ایئر سیفٹی بورڈ کی جانب سے پاکستانی پروازوں پرعائد پابندی کے خاتمے پر وزیراعظم میاں شہباز شریف نے خیر مقدم کرتے ہوئے اس کو خوش آئند کیا ہے۔

تفصیلات کے مطابق وزیراعظم میاں شہباز شریف کا کہنا تھا کہ پی ٹی آئی رہنماؤں کے غیرذمہ دارانہ بیانات سے ماضی میں پاکستانی پروازوں پر پابندیاں لگیں اور پی ٹی آئی رہنماؤں کے غیرذمہ دارانہ بیانات سے ملکی ساکھ کو نقصان پہنچا۔ ان کا کہنا ہے کہ برطانیہ کی جانب سے پاکستانی پروازوں پر پابندیوں کاختم ہونا برطانیہ میں مقیم پاکستانیوں کے لیے باعث اطمینان ہے۔

انہوں نے مزید کہا کہ پاکستانی ائیرلائنز کو عالمی کمپنیوں کے ساتھ مسابقت میں لانے کے لیے اقدامات جاری ہیں، حکومت ایوی ایشن سیکٹر میں بین الاقوامی معیارکے تقاضے پورا کرنے کے لیے اقدامات اٹھا رہی ہے۔ وزیراعظم شہبازشریف کا کہنا تھا کہ پاکستان اور برطانیہ کے درمیان قومی ائیرلائن کی پروازوں کا دوبارہ آغاز اہم سنگ میل ہے، اس مثبت پیشرفت سے بین الاقوامی سطح پر پاکستان کی ساکھ میں اضافہ ہوگا اور برطانیہ کے ساتھ پاکستان کے دو طرفہ تعاون کو مزید فروغ ملے گا۔