محکمہ لائیوسٹاک کے افسران کروڑوں روپے لے اڑے

خیبرپختونخوا (کھوج نیوز) محکمہ لائیو سٹاک کے افسران کروڑوں روپے لے اڑے مگر کس مد میں؟ اس حوالے سے آڈٹ رپورٹ میں چونکا دینے والے انکشافات منظر عام پر آگئے ہیں۔

تفصیلات کے مطابق موصول ہونیوالی دستاویزات میں بتایا گیا ہے کہ محکمہ لائیو سٹاک کے ہونے والے آڈٹ میں انکشاف ہوا ہے کہ محکمہ لائیو اسٹاک نے آڈٹ کے دوران 80 گاڑیوں کا ریکارڈ پیش نہیں کیا، محکمہ ایکسائز کے مطابق 80 سے زائد گاڑیاں ڈی جی لائیو اسٹاک کے نام رجسٹرڈ ہیں اور رجسٹریشن کے باوجود غائب گاڑیاں فیلڈ یا دفاتر میں موجود نہیں۔

آڈٹ رپورٹ میں محکمہ لائیو اسٹاک کی غائب سرکاری گاڑیوں کا پتا لگانے کی سفارش کی گئی ہے اور آڈٹ رپورٹ نے محکمے کی شفافیت پربھی سوالات اٹھا دیے ہیں۔ ذرائع کے مطابق محکمے نے 200 سے زائد گاڑیاں منصوبوں کے لیے خریدی تھیں اور یہ سال 2007 سے 2021 تک لائیوسٹاک پروجیکٹس کیلئے خریدی گئی تھیں۔ اس حوالے سے جیو نیوز سے گفتگو میں صوبائی وزیر لائیواسٹاک فضل حکیم کا کہنا تھاکہ میں نے تمام گاڑیوں کو جمع کرنے کے احکامات دیے ہیں اور گاڑیوں کی ریکوری کے لیے لیٹرز جاری کردیے ہیں۔