حافظ آباد: 3 افراد کو قتل کرکے لاشیں جلانے والا ملزم بیرون ملک فرار ہوتے ہوئے گرفتار

حافظ آباد: تین افراد کو قتل کرنے کے بعد لاشیں جلانے کے واقعے میں نامزد ایک اہم ملزم کو بیرون ملک فرار ہوتے ہوئے گرفتار کرلیا گیا۔

پولیس کے مطابق تہرے قتل کا ملزم قطر فرار ہونے کی کوشش کررہا تھا جسے اسلام آباد ائیرپورٹ پر گرفتار کیا گیا۔

پولیس کا کہنا ہےکہ  ملزم کو گرفتاری کے بعد تھانہ ونیکے تارڑ پولیس کے حوالے کردیا گیا جہاں مزید تفتیش  جاری ہے۔ 

واضح رہے کہ دو روز قبل ملزمان نے تین افراد کو قتل کرنے کے بعد ان کی گاڑی کو آگ لگا دی تھی، مقتولین میں ایک اسپین سے آنے والا شخص اور ایک پولیس کانسٹیبل شامل تھا۔

پولیس نے واقعے کا مقدمہ 16 افراد کے خلاف درج کیا جس میں 8 نامعلوم افراد شامل ہیں جب کہ دیگر ملزمان کی تلاش جاری ہے۔