گلگت بلتستان (کھوج نیوز) مقبوضہ کشمیر کی آزادی کے حوالے سے صدر مملکت آصف علی زرداری نے مودی سرکار کو دو ٹوک پیغام دیتے ہوئے کہا کہ مقبوضہ کشمیر کی آزادی اب وقت کی ضرورت ہے۔
تفصیلات کے مطابق صدر مملکت آصف علی زرداری کا کہنا تھا کہ آپ کی بہادری کو تاریخ کبھی نہیں بھلا سکتی،1947ء میں آپ نے جہاد کرکے پاکستان میں الحاق کیا،1947ء کی جنگ میں آپ کے1700 جوان شہید ہوئے۔ انہوں نے کہا کہ سی پیک پاکستان کی ترقی کا مظہر ہے، چین ہمارا دوست اور شراکت دار ملک ہے، سی پیک فیز ٹو کامیابی سے اپنے مراحل طے کررہا ہے۔ صدر آصف علی زرداری کا کہنا تھا گلگت بلتستان کو دیگر صوبوں کی طرح ترقی یافتہ دیکھنا چاہتے ہیں، گلگت بلتستان ترقی کرے گا تو پاکستان ترقی کرے گا۔
صدر مملکت آصف علی زرداری کا کہنا تھا کہ بھارت میں مسلمانوں کے ساتھ ظلم کا بازار گرم ہے، بھارت میں کشمیریوں کی نسل کشی انتہاء کو پہنچ چکی ہے، مقبوضہ جموں و کشمیر کی آزادی وقت کی ضرورت ہے، مقبوضہ کشمیر طویل عرصے سے بھارت کے مظالم کا شکار ہے۔ ان کا کہنا تھا گلگت بلتستان کو تعلیم اور صحت کی سہولیات ملنی چاہئیں، یہاں ہر وادی میں سکول ہونے چاہئیں، گلگت بلتستان معدنیات سے مالا مال ہیں، یہ پہاڑ آپ کا اور میرا سرمایہ ہیں، یہاں سیاحت کو فروغ مل سکتا ہے، گلگت بلتستان کو اپنی ایئرلائن بھی ملنی چاہیے۔
