اسلام آباد(کھوج نیوز) وزیراعظم شہباز شریف نے قومی اسمبلی کے اجلاس میں خطاب کرتے ہوئے دوٹوک مؤقف اپناتے ہوئے کہا کہ افغانستان دہشت گردوں کو لگام دے تو بہتر ہوگا۔
تفصیلات کے مطابق وزیراعظم شہباز شریف کا کہنا تھا کہ وانا میں دہشت گردوں نے کل ایک بار پھر دہشت گردی کا بازار گرم کرنے کی گھٹیا حرکت کی، طلبہ اور استاتذہ کو بحفاظت بازیاب کرانے پر افواج پاکستان کو خراج تحسین پیش کرتا ہوں، کل اسلام آباد کچہری میں 12 افراد شہید ہوئے، وانا اور اسلام آباد کچہری اور دیگر واقعات میں خارجی ہاتھ واضح ہے، ان دہشت گردی کے واقعات میں بھارت ملوث ہے۔
وزیر اعظم کا کہنا تھا کہ بھارت کو چار دن کے معرکے میں شکست فاش دی، نریندرمودی بیبسی کا شکار تھا اور اب بھی ہے، دہشت گردی کے خلاف ہم سب ایک ہیں، افغان عوام کی ہم نے40 سال میزبانی کی، یقین دلایا کہ آپ ہمارے مہمان ہیں، افغانستان سے کہتے ہیں کہ وہ ہمارے ساتھ امن میں شریک ہو، آج ہمیں 40 سال کی مہمان نوازی کا جو صلہ دیا جا رہا ہے اسے دنیا دیکھ رہی ہے۔ان کا کہنا تھاکہ میثاق جمہوریت میں واضح لکھا ہے کہ آئینی عدالت بنائیں گے، چیف جسٹس پاکستان یحیی آفریدی کا مشکورہوں، چیف جسٹس سے درخواست کی ریونیو کے کیسز جلد حل ہونے چاہئیں، اللہ کا شکر ہے ریونیو سے متعلق کیسز میرٹ پر حل ہوئے، چیف جسٹس ہی سپریم جوڈیشل کونسل، جوڈیشل کمیشن اور لا اینڈ جسٹس کمیشن کی سربراہی کریں گے۔
انہوں نے کہا کہ پاکستان خطے کی ترقی اور خوشحالی کا گہوارا بنے گا، آرمی چیف کو فیلڈ مارشل کا ٹائٹل دیا گیا توپوری قوم نے اس فیصلے کو سراہا، افواج پاکستان اور قانون نافذ کرنے والے ادارے دہشت گردی کا مقابلہ کر رہے ہیں، آج دہشت گردی کے خلاف سب سے زیادہ قربانیاں فوج کے افسر اور جوان دے رہے ہیں۔ وزیراعظم کا کہنا تھا کہ ہم چاہتے ہیں امن قائم ہو، وانا کے حملہ آوروں میں افغان بھی شامل تھے، افغان وزیر خارجہ بھارت گئے اورپھر دوسرے دورے کیے یہ پیغامات اچھی طرح سمجھ آرہے ہیں، پاکستان کی ترقی اور خوشحالی میں ان دہشت گردوں کو حائل نہیں ہونے دیں گے۔
