اسلام آباد(کھوج نیوز) وفاقی آئینی عدالت کا سربراہ کون ہوگا؟ اس حوالے سے فائنل نام سامنے آگیا ہے، اس کے متعلق آج جاری ہونے والے نوٹیفکیشن میں نام کا اعلان ہونے کا امکان ہے۔
تفصیلات کے مطابق جسٹس امین الدین اس وقت آئینی بینچ کے سربراہ ہیں، وہ اس ماہ کے آخر میں ریٹائر ہو رہے ہیں۔ ذرائع کے مطابق چیف جسٹس یحییٰ آفریدی کی جانب سے جسٹس امین الدین کے اعزاز میں عشائیہ کا اہتمام کیا گیا ہے۔ جسٹس امین الدین کے اعزاز میں عشائیہ کل چیف جسٹس ہاؤس میں ہوگا۔ ذرائع کے مطابق سپریم کورٹ ججز کو بھی عشائیہ میں مدعو کیا گیا ہے۔ جسٹس امین الدین نے 30 نومبر کو عہدہ سیریٹائر ہونا ہے۔
خیال رہے کہ 27 ویں آئینی ترمیم کا بل دونوں ایوانوں سے منظور ہو چکا ہے اور صدر مملکت کے دستخط کے بعد یہ بل اب آئین کا حصہ بن گیا ہے۔ آرٹیکل 176 میں ترمیم کے تحت موجودہ چیف جسٹس کو ٹرم پوری ہونے تک چیف جسٹس پاکستان کہا جائیگا۔ آرٹیکل 255 شق دو میں ترمیم کی گئی ہے جو کہ موجودٹرم کے بعد چیف جسٹس پاکستان کی تعیناتی سے متعلق ہے۔ چیف جسٹس سپریم کورٹ اور چیف جسٹس وفاقی آئینی عدالت میں سے سینئر ترین چیف جسٹس پاکستان ہوگا۔ 27ویں آئینی ترمیم کے تحت صدر مملکت وزیراعظم کی ایڈوائس پر وفاقی آئینی عدالت کے ججوں کا تقرر کریں گے۔
